Афсонавий мураббий Мирчо Луческу 80 ёшида ҳаётдан кўз юмди
Жаҳон футболи яна бир буюк ва тажрибали мутахассисидан айрилди. Руманиялик машҳур мураббий Мирчо Луческу 80 ёшида вафот этди. Бу ҳақда руманиялик журналист Эмануэл Рошу маълум қилди.
Маълум қилинишича, Луческу бир муддат олдин юрак хуружи сабаб шифохонага ётқизилган эди. Шунга қарамасдан, у ўз фаолиятини тўхтатмаган ва Руминия миллий жамоасини Жаҳон чемпионати-2026 саралаш баҳсларида бошқаришда давом этган. Аммо жамоа Туркияга мағлуб бўлиб, мундиалга йўлланмадан маҳрум бўлганди.
Мирчо Луческу ўз фаолияти давомида кўплаб клуб ва терма жамоаларда муваффақиятли иш олиб борган. Айниқса, у «Шахтёр» ва «Динамо Киев» жамоаларидаги натижалари билан кенг танилган. Шунингдек, Руминия ва Туркия миллий жамоаларида ҳам бош мураббий сифатида фаолият юритиб, катта тажриба тўплаган.
Футбол оламида у энг кўп соврин қўлга киритган мураббийлардан бири сифатида тарихда қолди. Луческунинг бой мероси, футболга қўшган ҳиссаси ва тарбиялаган шогирдлари унинг номини узоқ йиллар давомида яшатиши аниқ.
Бу йўқотиш футбол мухлислари ва бутун спорт жамоатчилиги учун катта мусибат бўлди.