Де Лаурентис Италия футболини инқироздан чиқариш режасини очиқлади
Италия терма жамоаси Жаҳон чемпионати–2026 йўлланмасидан "қуруқ қолиши" ортидан, “Наполи” клуби президенти Аурелио Де Лаурентис мамлакат футболидаги кескин вазиятни бартараф этиш учун батафсил режасини эълон қилди.
Эслатиб ўтамиз, Женнаро Гаттузо шогирдлари ҳал қилувчи баҳсда Босния ва Герцеговинага имкониятни бой бериб (1:1, пен. 1:4) кетма-кет учинчи бор мундиалсиз қолганди. Бу натижа нафақат терма жамоа, балки бутун Италия футбол муҳити учун оғир зарба бўлди.
Де Лаурентиснинг фикрича, “Серия Ада илгари 16 та жамоа иштирок этарди, ҳозир эса 20 та. Агар биз яна 16 талик форматга қайтсак ва Саудия Арабистонида Суперкубок учрашувларини тўхтатсак, футболчиларнинг энергиясини тежай олардик. Уларга маошни ФИФА ёки УЕФА эмас, балки биз тўлаймиз. Бу ҳолат терма жамоа учун машғулотлар ва тайёргарлик учун қўшимча вақт яратади”.
Унинг сўзларига кўра, ҳозир айбдор қидиришдан фойда йўқ, чунки Италия футболи узоқ йиллардан бери “уйқуда” ва ўзгаришсиз қолиб келган. Де Лаурентис эса бу жараёнда ҳақиқат йўлида туриш ва самарали ислоҳотлар амалга оширишга ишонч билдирди.
Шу тариқа, Италия футболининг тизимли муаммолари ва Де Лаурентиснинг таклиф қилган эҳтимолий ислоҳотлари яқин орада қизғин муҳокамалар ва кенг жамоатчилик эътирозига сабаб бўлиши кутилмоқда.