«Реал» тиббий штаби адашиб Мбаппенинг соғлом тиззасини текширган экан

Мадриднинг «Реал» клуби тиббий жамоаси Килиан Мбаппенинг тикланиш жараёнидаги муҳим босқичда жиддий хато содир этгани маълум бўлди. Бу воқеа клуб ва мухлислар орасида катта шов-шувга сабаб бўлди.

Маълумотларга кўра, француз юлдузи 7 декабрь куни «Сельта»га қарши ўтказилган баҳсда чап тиззасидан жароҳат олган ва шу боис январь-февраль ойларидаги бир қатор муҳим ўйинларни ўтказиб юборган эди. Кейинчалик Мбаппе тўлиқ тикланганини расман эълон қилди, бироқ унинг соғайиш жараёнида ғалати ҳолат юз берган.

Франциялик спорт журналисти Даниэль Риоло аввалроқ «Реал» шифокорлари адашганини таъкидлаган эди. Эндиликда Испаниянинг нуфузли «COPE» нашри ходими Мигель Анхель Диас ҳам бу маълумотни тасдиқлади. Унинг таъкидлашича, тиббий штаб нотўғри қарор қилиб, жароҳатланган чап тиззаси ўрнига Мбаппенинг соғлом ўнг тиззасини текширган.

Айнан шу пала-партишлик сабаб клуб раҳбарияти тиббий жамоани огоҳлантириш ва эҳтимолий истеъфога тортиш чораларини кўрмоқда. Бу эса «Қироллик клуби» учун жиддий сигнал бўлиб, футболчиларнинг хавфсизлиги ва муваффақиятини таъминлашда тиббий штабнинг масъулияти қанчалик муҳим эканини яна бир бор кўрсатди.

Ҳозирда Мбаппе соғайган ва майдонга қайтган бўлса-да, бу ҳодиса клуб учун катта сабоқ бўлди. Мухлислар ва экспертлар шифокорларнинг эътиборсизлиги ҳақида фикр юритиб, бундай хатоларнинг келгусида такрорланмаслиги зарурлигини таъкидламоқда.