Моуринью ўзини сотқин деб атаган мураббийга жавоб қайтарди
Португалия чемпионатида "Бенфика" ва "Порту" жамоалари ўртасидаги "О Классико" деб номланган марказий баҳс кескин курашларга бой бўлди. Учрашув 2:2 ҳисобидаги дуранг билан якунланган бўлса-да, ўйин якунидаги воқеалар асосий мавзуга айланди. "Бенфика" бош мураббийи Жозе Моуринью ҳакам томонидан майдондан четлатилди. Бу ҳақда goal.com хабар беради.
Ўйиннинг 89-дақиқасида Леандро Баррейро ҳисобни тенглаштирганидан сўнг, майдон четида катта жанжал келиб чиқди. Моуринью "Порту" мураббийлар штаби вакили Лучу Гонсалес билан тўқнашиб кетди. Тажрибали мураббийнинг сўзларига кўра, Гонсалес уни 50 марта сотқинликда айблаган. Моуринью эса бу айбловларни кескин рад этиб, ўзининг профессионал фаолияти давомида барча клубларга бор кучини берганини таъкидлади.
Ҳакам Моуриньюни тўпни рақиб захира ўриндиғига қаратиб тепгани учун майдондан четлатганини маълум қилди. Бироқ португалиялик мутахассис бу иддаони инкор этиб, тўпни трибунадаги мухлисларга совға қилмоқчи бўлганини айтди. У тўртинчи ҳакамнинг ишини ҳам қаттиқ танқид қилди.
Учрашув натижасига келсак, "Порту" 66 очко билан турнир жадвалида етакчиликни сақлаб қолди. "Бенфика" эса пешқадамдан 7 очко ортда қолмоқда. Моуринью чемпионлик пойгаси ҳали тугамаганини ва олдинда муҳим ўйинлар борлигини қўшимча қилди.