«Галатасарай» ва «Фенербаҳче» футболчиларини гаров можароси қамоққа етаклаши мумкин
Туркиянинг икки гранди — «Галатасарай» ва «Фенербаҳче» сафида тўп сурадиган футболчиларга гаров ўйинларида иштирок этгани учун қамоқ жазоси таҳдид солмоқда. Бу ҳақда euro-football.ru хабар беради.
Гап «Галатасарай» футболчиси Метехан Балтаджи ҳамда «Фенербаҳче» сардори Мерт Ҳакан Яндаш ҳақида кетмоқда. Уларнинг биринчиси 13 йилгача, иккинчиси эса 17 йилгача озодликдан маҳрум этилиши мумкин.
Sabah нашри маълумотига кўра, Балтаджи камида икки бор «Галатасарай» иштирокидаги ўйинларга пул тиккан. У учрашувларда асосий таркибда бўлмаган, бироқ қайдномага киритилган — бу эса футболчи натижага билвосита таъсир кўрсатиши мумкинлиги ҳақидаги саволларни кучайтиради.
Амалдаги Туркия қонунчилигига кўра, у букмекерлик идораларига профессионал спортчи эканини билдиришга мажбур бўлган, бироқ бу талаб бажарилмагани айтилмоқда.