Роналду пенальти ура олмади, «Ал-Наср» қийин ғалаба қозонди
Саудия Арабистони чемпионатининг шанба кунги учрашувида «Ал-Фейҳа» ўз майдонида «Ал-Наср»ни қабул қилди. Турнир пешқадами кўплаб нохуш вазиятларга қарамай, ўйинни охир-оқибат ўз фойдасига ҳал қилди. Бу ҳақда euro-football.ru хабар беради.
Учрашув бошидаёқ Криштиану Роналду пенальтидан чап устунга текизиб қўйди ва тўп майдон ташқарисига чиқиб кетди. Биринчи бўлим якунланиши арафасида эса мезбонлар олдинга чиқиб олди: ўнг қанотдан узатилган пасдан кейин дарвозабон тўпни илиб олишга чиқди, бироқ ҳимоячи Абдулела ал-Амри ўз дарвозасига тўпни кесиб юборди — 1:0.
Иккинчи бўлимда «Ал-Наср» босимни кучайтирди: Жоау Фелишнинг жарима майдонидан зарбаси блокланди, қайтган тўпга Роналду 15 метрдан тепадан йўллаган зарбада дарвозабон қутқариб қолди. 72-дақиқада Султон ал-Ганамнинг узоқ узатмасидан кейин Кингсли Коман жарима майдонига кириб, узоқ устунга пас узатди ва Садио Мане ҳеч ким халақит бермаган вазиятда ҳисобни тенглаштирди — 1:1.
Кейин Марсело Брозович шеригини дарвозабон билан яккама-якка чиқарган вазиятда Айман Яҳё имкониятдан фойдалана олмади. Коман ҳам узоқ бурчакка йўллаган зарбасида дарвозабонни алдолмади. 80-дақиқада бурчак тўпидан кейин тўп Фелишга келди, у 20 метрдан яқин устунга текизди, тўп дарвозабон танасига тегиб, чизиқдан ўтди — 1:2.
Орадан кўп ўтмай «Ал-Наср» устунлигини мустаҳкамлади: Абдуллаҳ ал-Ҳамдан ва Фелиш жарима майдонига комбинация билан ёриб кириб, ҳал қилувчи зарбани 8 метрдан Абдуллаҳнинг ўзи йўллади — 1:3. Шу тариқа меҳмонлар қийин ўйинда уч очкони қўлга киритди.
Натижадан сўнг «Ал-Фейҳа» турнир жадвалида 11-ўринни бўлишиб турибди. «Ал-Наср» эса икки очколик устунлик билан пешқадамликни сақлаб қолди.