Майкл Антонио фаолиятини Қатарда давом эттирадиган бўлди
«Вест Ҳем»нинг собиқ ҳужумчиси Майкл Антонио яна майдонга қайтмоқда. У Қатар чемпионатида иштирок этувчи «Ал-Сайлия» клуби билан келишувга эришиб, фаолиятини шу ерда давом эттирадиган бўлди. Бу ҳақда euro-football.ru хабар беради.
Манбага кўра, футболчи аввалроқ ўзига кучлироқ ва рақобат юқори бўлган лига топишга уринди, бироқ бу ҳаракатлари кутилган натижани бермади. Якунда Антонио Қатар вариантига рози бўлишига тўғри келди.
2024 йил декабр ойида йўл-транспорт ҳодисасига учраганидан кейин унинг Европада яна юқори даражада ўйнаши қийин экани айтилмоқда. Шунга қарамай, «Вест Ҳем» футболчини шунчаки ишдан бўшатмади — клуб у билан шартномани узайтирмади ва Антонио ўтган ёздан бери эркин агент сифатида қолиб кетганди.
У июн ойида Ямайка терма жамоаси сафида Панама билан ўйинда кўриниш берган, шундан бери эса расмий учрашувларда майдонга тушмаган.
Антонио янги жамоаси сафида атиги олти учрашув ўтказиши кутилмоқда: Қатар мавсуми апрел ойида якунланади, ундан кейин жазирама иссиқ сабаб ўйинларни ўтказиш деярли имконсиз бўлиб қолади.