Флик «Барселона» ҳеч қачон таслим бўлмаслигини хоҳлайди
«Барселона» бош мураббийи Ҳанс-Дитер Флик Каталония клубидаги иш жараёни ва жамоага қўйиладиган талаблар ҳақида фикр билдирди. Бу ҳақда euro-football.ru хабар беради.
Мутахассиснинг айтишича, «Барселона»да фақат натижа эмас, балки майдондаги ўйин услуби ҳам катта аҳамиятга эга. Флик ўтган мавсум «Интер»га қарши икки учрашувдан сўнг мусобақани тарк этиш аламли бўлганини, бироқ жамоа кўрсатган ўйин барибир фахр уйғотганини эслатди.
Мураббий бундай ёндашувни давом эттириш муҳимлигини таъкидлади: клубда ҳар бир детал муҳокама қилинади, таҳлил қилинади, мухлислар эса «Барселона» билан яшайди. Флик жамоа жуда ёш ва иқтидорли эканини қайд этди, аммо рақобатбардош бўлиш учун ҳар бир машғулотда 100 фоиз ишлаш шартлигини уқтирди.
«Мен ҳеч қачон қўл силтаб қўймайдиган жамоани кўришни хоҳлайман. Бу «Барселона»нинг ДНКси», — деди Флик клуб телеканалига берган интервьюсида.
Ҳозирда «Барселона» Ла Лигада пешқадам бўлиб турибди ва иккинчи ўриндаги «Реал»ни бир очкога ортда қолдирмоқда.