Мбаппе «Атлетико»га қарши дербида майдонга тушмайди
Мадриднинг «Реал» клуби ҳужумчиси Килиан Мбаппе Испания Суперкубоги ярим финалида «Атлетико»га қарши ўйинни ўтказиб юборади. Бу ҳақда euro-football.ru хабар беради.
Аввалроқ маҳаллий ОАВ француз футболчиси жароҳатдан тикланиб, 8-январь куниги дербида майдонга тушиши мумкинлигини ёзганди. Бироқ журналист Мигел Анхель Диаснинг янгиланган маълумотларига кўра, 27 ёшли форвард «матрасчилар»га қарши баҳсда аниқ ўйнамайди. Ҳатто у Суперкубок учрашувлари бўлиб ўтадиган Саудия Арабистонига жамоа билан бирга парвоз қилмаслиги ҳам эҳтимолдан холи эмас.
«Реал» – «Атлетико» учрашуви 00:00 да (Тошкент вақти билан) старт олади. Мбаппе жорий мавсумда 24 та ўйинда 29 та гол уриб, ажойиб натижа қайд этиб келмоқда.