Муслера: Роналду мундиални ютмайди, Месси эса энг зўри, деди
Уругвай терма жамоасининг собиқ дарвозабони Фернандо Муслера 2026 йилги жаҳон чемпионати арафасида Криштиану Роналду ва Лионел Месси ҳақида фикр билдирди. Бу ҳақда euro-football.ru хабар беради.
Муслеранинг таъкидлашича, 2026 йилги мундиал иккала ҳужумчи учун ҳам терма жамоа миқёсидаги сўнгги йирик турнир бўлиши эҳтимоли юқори. Португалиялик футболчи тез орада 41 ёшга киради, аргентиналик юлдуз эса июнь ойида 39 ёшни қарши олади.
«Мен Уругвай, Аргентина ва Испанияни чемпионликка асосий даъвогарлар деб биламан. Бразилия эса улардан бир поғона пастроқ. Ўйлайманки, Криштиану Португалия билан жаҳон чемпионлигини қўлга кирита олмайди. Мен ҳам Роналду, ҳам Мессига қарши ўйнаганман — ҳиссиётлар мутлақо бошқача. Менга шу бўйи паст йигит ёқади. Лео аллақачон жаҳон чемпиони бўлган ва умид қиламанки, у доимо энг зўр бўлиб қолади», — дея Муслера сўзларини ESPN келтирди.
2026 йилги жаҳон чемпионати ўйинлари АҚШ, Канада ва Мексикада июнь—июль ойларида бўлиб ўтади.