Эмери "Арсенал"га қарши ўйиндан сўнг нега Артетанинг қўлини сиқиб қўймади?

АПЛ 19-тури доирасида бўлиб ўтган баҳсда «Астон Вилла» ўз майдонида «Арсенал»га 1:4 ҳисобида мағлуб бўлди. Учрашувдан кейин эса майдон четидаги вазият мухлислар эътиборини тортди: бирмингемликлар бош мураббийи Унаи Эмери рақиб жамоа устози Микель Артета билан қўл бериб кўришмади.

Финал ҳуштаги янграши билан Эмери тўғридан-тўғри трибуна остига йўл олди. Бу ҳолат ижтимоий тармоқларда муҳокамаларга сабаб бўлгач, испаниялик мутахассис вазиятга изоҳ берди.

«Мен одатда рақиб мураббий олдига бораман, қўл бериб кўришаман ва шундан кейин ичкарига кириб кетаман. Агар у бу қоидага амал қилмаса, мен кутиб тура олмайман. Қолаверса, ҳаво ҳам жуда совуқ эди», — деди Эмери.

Мураббийнинг сўзларига қараганда, бу ҳолатда ҳеч қандай асабийлик ёки ҳурматсизлик бўлмаган. Шунчаки ўйиндан кейинги одатий тартиб бузилган, холос. Мухлислар эса бу изоҳни турлича қабул қилди: кимдир Эмерини қўллаб-қувватласа, кимдир майдон этикетини унутмаслик кераклигини таъкидламоқда.