Жаҳон чемпионлари Президент совғалари билан тақдирланди

Бугун пойтахтимиздаги Олимпия ва паралимпия шон-шуҳрати музейида каратэ WKF ҳамда таэквондо WT бўйича жаҳон чемпионатларида юртимиз шарафини муносиб ҳимоя қилган спортчиларни тақдирлаш маросими бўлиб ўтди. Тантанали тадбирда олий марраларни забт этган чемпионлар, совриндорлар ва уларнинг устоз-мураббийлари эътибор марказида бўлди.

Маросим давомида спортчиларга давлатимиз раҳбарининг қимматбаҳо совғалари ҳамда муносиб пул мукофотлари топширилди. Бу эса мамлакатимизда спортга бўлган юксак эътибор, меҳнат ва ғалабанинг қадри қанчалик баланд эканини яна бир бор намоён этди.

Айниқса, спорт тарихимизда илк бор аёллар ўртасида каратэ WKF бўйича жаҳон чемпионлигини қўлга киритган Гулшан Алимардонова ҳамда ўн йиллик танаффусдан сўнг таэквондо WT бўйича Ўзбекистонга жаҳон чемпионлиги олиб келган Нажмиддин Қосимхожиев алоҳида эътироф этилди. Ушбу икки чемпионга “BYD Song Plus” автомобили ва 15 минг АҚШ долларидан пул мукофоти топширилди.

Шунингдек, жаҳон чемпионатларида кумуш ва бронза медалларига сазовор бўлган спортчилар ҳамда уларни катта ғалабаларга тайёрлаган мураббийлар ҳам эътибордан четда қолмади. Уларга ҳам бир марталик пул мукофотлари тақдим этилди.

Бу каби эътироф ва рағбат спортчилар учун янги зафарлар сари кучли мотивация бўлиб хизмат қилиши, ўзбек спортининг халқаро майдондаги нуфузини янада ошириши шубҳасиз.