Հայաստանի ու Ադրբեջանի կողմից կարող են ստորագրվել տասնյակ փաստաթղթեր, բայց դրանք չեն փոխի իրավիճակը. Տրոֆիմչուկ
Ներկայումս դժվար է ասել, թե որ տեղում է Լեռնային Ղարաբաղը Ռուսաստանի համար, որովհետև մեծ պատերազմ ղարաբաղա-ադրբեջանական սահմանին չի ծավալվում: Tert.am-ի հետ զրույցում ասաց միջազգայնագետ, անվտանգության և պաշտպանության ոլորտների փորձագետ, ռուս վերլուծաբան Գրիգորի Տրոֆիմչուկը` խոսելով ՀՀ առաջին նախագահ Լևոն Տեր-Պետրոսյանի հայտարարության մասին, որ «Ռուսաստանը չի կարող հսկայական ծրագրեր ունենալով Մերձավոր Արևելքում իր թիկունքում այսպիսի պայթյունավտանգ օջախ հանդուժրել», ինչպիսին Լեռնային Ղարաբաղն է:
Տրոֆիմչուկը հիշեցրեց, որ նախորդ տարվա ապրիլյան իրադարձությունների ժամանակ ղարաբաղյան հակամարտությունը միանգամից առաջնային դարձավ Ռուսաստանի համար: «Ղարաբաղի հակամարտության, Ուկրաինայի, Մերձավոր Արևելքի և մի շարք այլ հակամարտությունների շարքում միանշանակ, թեժ օջախ է Ռուսաստանի համար: Ռուսաստանը կարող է չդիմանալ այս ծանրությանը: Դրա համար Հայաստանից մշտապես հիշեցնում են ղարաբաղյան հակամարտության կարևորության մասին»,- նշեց վերլուծաբանը:
Գրիգորի Տրոֆիմչուկի խոսքով՝ Ադրբեջանն էլ ուզում է, որ հակամարտությունը լուծվի, բայց այնպես, որ Ռուսաստանն օգնի իրենց Ղարաբաղն ու Ղարաբաղի շուրջ գտնվող տարածքները տալու իրենց:
«Հայաստանը Ռուսաստանի առաջ հակամարտության կարգավորման խնդիրը շատ մեղմ, է դնում, դիվանագիտական, երբեմն՝ բավական խիստ, երբ հայտարարում է, որ ՀԱՊԿ-ը պետք է հստակ կողմնորոշում ունենա ԼՂ հարցում: Բայց ապրիլյան իրադարձություններից հետո հասկանալի չէ, թե ինչ է կատարվում Ղարաբաղի հակամարտության շուրջ բանակցային գործընթացում, բացարձակ հասկանալի չէ: Ապրիլից հետո Մոսկվայի, Բաքվի և Երևանի միջև սկսվեց ակտիվ երկխոսություն, բայց փետրվարյան իրադարձություններից հետո, ցավոք, նման բան չկա: Սա մտահոգիչ է, կողմերը, հավանաբար, միմյանց ասելու բան չունեն»,- մանրամասնեց Տրոֆիմչուկը:
Հարցին՝ համաձա՞յն եք Լևոն Տեր-Պետրոսյանի հետ, որ եթե Հայաստանն, ըստ էության, առաջինը ստորագրի Մադրիդյան սկզբունքները, ապա Ադրբեջանն էլ կգնա դրան, եթե ոչ, ապա միջազգային հանրությունը կպարտադրի Բաքվին ընդունել Մադրիդյան փաստաթղթերը: Այս առնչությամբ Գրիգորի Տրոֆիմչուկն ասաց. «Կարծում եմ, որ Հայաստանի ու Ադրբեջանի կողմից կարող են ստորագրվել տասնյակ փաստաթղթեր, բայց դրանք չեն փոխի իրավիճակը: Փաստաթղթերի ստորագրումը ազդեցություն չի ունենա, այն կձգձգի ներկայիս դրությունը, որովհետև Հայաստանն Ադրբեջանին հող չի տա: Ամեն դեպքում, հայկական կողմը քանի տարի է հայտարարում է, որ պետք է հստակ տեսնի, որ Հայաստանի համար անվտանգությունը պիտի մեծանա: Քանի դեռ Հայաստանն իր համար չի տեսնի այդ անվտանգության ամրապնդումը, որևէ մեկին ոչ մի բան չի տա, ինչ փաստաթուղթ էլ ստորագրվի: Իսկ Ադրբեջանը սպասում է միայն մեկ փաստաթղթի՝ ճանապարհային քարտեզ, որով կփոխանցվի իրենց Ղարաբաղը: Ադրբեջանը սպասում է նաև հայկական կողմից փոխզիջումներ: Ադրբեջանը կարծում է, որ ինքը գնացել է այդ ճանապարհով, որ ինքը պատրաստ է քննարկել Ղարաբաղի կարգավիճակը և հիմա հերթը Հայաստանինն է: Ադրբեջանը սպասում է միայն հողերի վերադարձ»: