Կարծում եմ՝ ՀՎԿ-ն կլինի առաջին եռյակում. Արթուր Բաղդասարյանը՝ կուսակցության հնարավորությունների մասին
Կարծում եմ՝ ՀՎԿ-ն կլինի առաջին եռյակում. նախընտրական եզրափակիչ ասուլիսին հայտարարեց «Հայկական վերածնունդ» կուսակցության նախագահ Արթուր Բաղդասարյանը:
«Տեղեր կլինի, որ առաջին տեղը կլինենք, տեղեր կլինեն՝ երկրորդ և տեղեր կլինի, որ երրորդ տեղը»,-ասաց նա:
Արթուր Բաղդասարյանը նշեց, որ 20 տարվա քաղաքական գործիչ է և իրեն թույլ է տալիս նման եզրահանգում անել, և մի քանի օր հետո մարդիկ դրանում կհամոզվեն։
Բաղդասարյանն անդրադարձավ որոշ սոցիոլոգիական հարցումների, որոնց համաձայն ՀՎԿ-ն խորհրդարան անցնելու եզրագծին է:
«Մշտապես ՀՀ-ում կեղծ սոցիոլոգիական հարցումներ են արվում և դեռևս չի եղել, որ պատվիրված հարցումներով չողողեն քաղաքական դաշտը: Այսօր հիշում եք նախագահականին երեք տոկոս էին տալիս, հիշում ենք ինչքան հավաքեցի: Այդ սոցիոլոգները ասել էին, թե ՏԻՄ-ին կունենանք 2-ից, 2,5 տոկոս,բայց Վանաձոր, Գյումրի քաղաքներում 16-18% ունեցանք, ՀՀ-ում երկրորդ տեղը գրավեցինք ավագանու անդամների թվով, ունենք բազմաթիվ ընտրված համայնքի ղեկավարներ»,-ասաց նա:
Բաղդասարյանը հավելեց, թե ՏԻՄ ընտրություններից հետո ձեռքերը ծալած չեն նստել. «Այսինքն՝ ավելի ենք բազմապատկել մեր շարքերը: ՀՎԿ-ն պատվերով հարցումների ծառայությունից չի օգտվել»,-ասաց նա։
Հարցին, թե տեղեկություններ են տարածում, որ ՀՎԿ-ն որպես ընտրակաշառք այս անգամ սուրճի բաժակներ է բաժանում, Արթուր Բաղդասարյանը պատասխանեց. «Ես համարում եմ պարզագույն սրիկայություն և պարզագույն հակաքարոզչություն, դա էժանագին զրպարտանք է»,-ասաց նա: