Ադրբեջանն իրականում չի ցանկանում ավարտել պատերազմը և խաղաղություն հաստատել. Արտակ Զեյնալյան
«Հանրապետություն» կուսակցության և «Ելք» դաշինքի անդամ, իրավապաշտպան Արտակ Զեյնալյանը գտնում է, որ Ադրբեջանն իրականում չի ցանկանում ավարտել պատերազմը և խաղաղություն հաստատել:
Tert.am-ի հետ զրույցում նա ասաց. «Ադրբեջանում բավականին ներքին խնդիրներ կան, և այն, ինչ-որ կատարվում է, նպատակ է հետապնդում հետաձգել այդ խնդիրների բացահայտումը»։
Անդրադառնալով ՀՀ առաջին նախագահ, «Կոնգրես-ՀԺԿ» դաշինքի խորհրդարանական ընտրությունների նախընտրական ցուցակը գլխավորող Լևոն Տեր-Պետրոսյանի հարցազրույցին՝ Արտակ Զեյնալյանն ասաց, որ կարծում է, որ առաջին նախագահի ներկայացրած դեպքերը, երբ Ադրբեջանը երկու անգամ հրաժարվել է ստորագրությունից, խոսում են այդ մասին, որ իրականում իրենք չեն ցանկանում խաղաղություն, չեն ուզում, որ այս առաջնային հիմնախնդիրը վերանա:
«Ես կարծում եմ, որ միջազգային ճնշում հիմա էլ կա Ադրբեջանի նկատմամբ, որը Ադրբեջանն արհամարհում է: Ադրբեջանի նկատմամբ տարբեր ուղղություններով բազմաթիվ ճնշումներ կան, սակայն իր համար միևնույն է»,-ասաց նա:
Ինչ վերաբերում է Ռուսաստանի դերակատարմանը և առաջին նախագահի այն գնահատականին, թե եթե այսօր կա մի գերտերություն, որը մեծապես շահագրգռված է հարցի շուտափույթ կարգավորման մեջ, ՌԴ-ն է, Արտակ Զեյնալյանը նշեց. «Իմ տպավորությամբ՝ Ռուսաստանին այս տարածաշրջանում դեռևս պետք չէ խաղաղություն: Իհարկե, առաջին նախագահի դիտարկումն առ այն, որ Արևմուտքում իրավիճակ է փոխվել, և իրենց այստեղ պետք է խաղաղություն, կարող է այդպիսի եզրակացություն լինել, բայց ես կարծում եմ, որ Ռուսաստանին այս պահին պետք չէ խաղաղություն»:
Նա նշեց, որ խաղաղության և համաձայնության պարագայում տարածաշրջանով կարող են էներգակիրների ուղիներ անցնել, ինչը դուրս կմղի Ռուսաստանին և ավելի կանկախացնի էներգակիրների սպառողներին:
Իրավապաշտպանը նշեց, որ բոլորն էլ խաղաղություն և հաշտություն են ցանկանում և իրենց ծրագրերում էլ նշել են, որ դեմ են սպառազինությունների մրցավազքին:
«Առաջին հերթին Արցախի ժողովրդին, իշխանություններին պետք է հարցնել, թե այդ խնդրի լուծումը բավարարո՞ւմ է իրենց»,-ասաց նա:
Արտակ Զեյնալյանը ՀՀ արտաքին քաղաքականության մեջ մեծ և ֆանտաստիկ ձեռքբերում համարեց, երբ Արցախը հանդիսացել է բանակցային կողմ:
«Կարծում եմ, որ ֆանտաստիկ ձեռքբերումների ռեսուրսներ ունենք, ինչպիսին եղել է առաջին նախագահի օրոք, սակայն դա ձախողել է նաև գործող իշխանությունը, երբ Արցախը դադարել է լինել բանակցային կողմ»,-ասաց նա և նշեց, որ այս ուղղությամբ պետք է աշխատանքներ իրականացնել և մշտապես պատրաստ լինել ցանկացած ռազմական գործողության:
Արտակ Զեյնալյանը համամիտ չէ տարբեր վերլուծաբանների գնահատականներին, որ իրականում Արցախի ներկայացուցիչների մասնակցությունը բանակցություններին եղել է ձևական, և որքան նրանք էին մասնակցում այդ բանակցություններին, Ադրբեջանի համայնքից ևս ներկայացուցիչներ մասնակցում էին: Նա ասաց, որ ընտրական իրավունքի իրացման արդյունքում Արցախում ձևավորված իշխանություններն էին մասնակցում այդ բանակցություններին, և այս դեպքում համամիտ է առաջին նախագահի հետ, որ դա ձեռքբերում էր: