ԱՄՆ Սենատում Իրանի նկատմամբ պատժամիջոցները խստացնելու մասին բանաձև է ներկայացվել
ԱՄՆ Սենատի մի շարք անդամներ ներկայացրել են երկկուսակցական օրինագիծ, որի հաստատման դեպքում Իրանի նկատմամբ սահմանված պատժամիջոցներն ավելի կխստացվեն ի պատասխան Թեհրանի կողմից բալիստիկ հրթիռների արձակմանը և միջուկային ոլորտի հետ չառնչվող մի շարք այլ գործողությունների իրականացմանը:
Ինչպես հայտնում է Reuters-ը, սենատորների քայլը միանգամայն արտացոլում է Միացյալ Նահանգների նախագահ Դոնալդ Թրամփի՝ Իրանի դեմ վարած կոշտ քաղաքականությունը:
Աղբյուրը մանրամասնում է, որ երկկուսակցական օրինագծի հեղինակները 14-ն են՝ 7-ը հանրապետական, 7-ը դեմոկրատ: Ոլորտի վերլուծաբանների կարծիքով՝ փաստաթուղթը բոլոր շանսերն ունի հաստատվելու և գործող օրենք դառնալու համար:
Նշվում է, որ հաստատման դեպքում ԱՄՆ իշխանություններն իրավասու կլինեն պատժամիջոցներ սահմանել Իրանի բալիստիկ հրթիռային ծրագրի զարգացման հետ առնչություն ունեցող ցանկացած անձի, ինչպես նաև Իրանի Իսլամական հեղափոխության պահապանների էլիտար կորպուսի անդամների դեմ:
Աղբյուրը հիշեցնում է, որ ընթացիկ տարվա փետրվարին Թրամփի վարչակազմը պատժամիջոցներ էր սահմանել Իրանի 25 քաղաքացիների և օբյեկտների նկատմամբ՝ նշելով, որ դրանք Իրանի սադրանքներին դիմակայելուն ուղղված առաջին քայլերն են: