Մենք իրավունք չունենք էվոլյուցիոն ճանապարհով, դանդաղ տեմպերով որոշումներ ընդունել. Սեյրան Օհանյան
Հայաստան եկող սպառնալիքներն այնքան արագ են զարգանում, որ մենք իրավունք չունենք էվոլյուցիոն ճանապարհով, դանդաղ տեմպերով որոշումներ ընդունել և փորձել առաջընթաց ապահովել Հայաստանի համար։ Այս մասին Արագածոտնի մարզի Թալին քաղաքում հայտարարեց պաշտպանության նախկին նախարար, «Օհանյան–Րաֆֆի–Օսկանյան» դաշինքի վարչապետի թեկնածու Սեյրան Օհանյանը:
«Իրականության մեջ մեր ապագայի մասին մտածելու համար պետք է մի քանի ենթադրություններ անել։ Առաջին հերթին պետք է վերլուծել այն իրադրությունը, որն այսօր ձևավորվել է Հայաստանի Հանրապետությունում՝ թե՛ տնտեսության զարգացման, թե՛ ժողովրդագրական խնդիրների, թե՛ նաև անվտանգության համակարգի մեջ պարունակող մի քանի այլ ուղղությունների մասին։ Մենք կգանք այն եզրակացության, որ իրականության մեջ իրավիճակը շատ դժվարին է։ Մենք վերջին տարիների ընթացքում ՀՀ զարգացման համար շատ դանդաղ միջոցառումներ ենք ձեռնարկել, որոնք իրենց էֆեկտիվությունը, արդյունավետությունը չեն ապահովել. դա և՛ տնտեսությունն է, և՛ յուրաքանչյուր անհատի բարեկեցությունն է, և՛, ընդհանուր առմամբ, քաղաքացիական հասարակության կերտումն է, արդարության ամրապնդումն է և շատ–շատ այլ խնդիրներ»,-շեշտեց նա։
Սեյրան Օհանյանը նշեց, որ իր համար որոշումներ ընդունելու և ծրագրեր մշակելու համար ամեն ինչի հիմքում դնում է երկրի անվտանգությունը:
«Եթե այսօր ռազմական անվտանգությունը գտնվում է բարվոք վիճակում, ապա մենք կարող ենք ասել, որ անվտանգության այլ բաղադրիչների մեջ՝ տնտեսական, ժողովրդագրական, տեղեկատվական, գիտական, կրթական, առողջապահական, մենք բավականին մեծ թերություններ ունենք։ Եվ դա է ստիպել, որ ես, խոր վերլուծելով իրավիճակը, տեսնելով՝ ինչ խաղի կանոններ կան Հայաստանում, որոշում եմ ընդունել մեր գաղափարակից ընկերների հետ քաղաքական այս կառույցը ձևավորել և գնալ պետական համակարգի փոփոխություններին։ Դրանց կարիքի մասին ոչ միայն ես, ոչ միայն մեր գաղափարակիցներն, այլ ողջ ժողովուրդն է խոսում»,-շեշտեց նա:
Սեյրան Օհանյանի դիտարկմամբ՝ հաջողության հասնելու համար պետք է թռիչքային, կոշտ փոփոխություններ արվեն, շուկան ազատականացվի մենաշնորհները վերանան, կոռուպցիայի , անարդարության դեմ պայքարել.
«Մեծ ռեսուրսներ այդ խնդիրների լուծման համար չեն պահանջվում, այլ անհրաժեշտ է քաղաքական կամք, վճռականություն, ամուր բռունցք, ամուր ձեռք, մենք պատրաստ ենք դրանք իրականացնելու մեր անցած ճանապարհով, մեր փորձառությամբ»,-շեշտեց նա:
Սեյրան Օհանյանի դիտարկմամբ՝ իրենց դաշինքում չեն կարող մատնանշել անձի կամ նրա հարազատի, ով թաթախված է տարբեր գործերի մեջ և թալանում է երկիրը: