Մենաշնորհը պետք չէ վերացնել, որ ուզես էլ չես կարող, մենաշնորհը պետք է բերել օրենքի դաշտ. տնտեսագետ
Համեմատած նախորդ խորհրդարանական ընտրություններին ներկայացված ծրագրերի հետ, այս տարվա խորհրդարանական ընտրություններին ներկայացված ծրագրերն ավելի որոշակի են:
Այս մասին Tert.am-ի հետ զրույցում ասաց տնտեսագետ Միքայել Միքայելյանը:
«Որոշ ուժերի ծրագրերում ավելի շատ որոշակիություն կա, բայց նույն բանը չեմ կարող ասել իշխանական կուսակցության ծրագրի մասին, չնայած ընտրողների պահանջներն ավելի շատ են իշխող կուսակցության ներկայացրած ծրագրերի նկատմամբ, քան ընդդիմադիր ուժերի: Մեկ, երկու, երեք ուժի մոտ ավելի առարկայական դրույթներ կան, ավելի որոշակիություն կա, սակայն որոշ կարևոր բաներ բացակայում են»,- նշեց տնտեսագետը:
Հարցին՝ ի՞նչն է, որ բացակայում է բոլոր ուժերի ծրագրերում, Միքայելյանը պատասխանեց, որ, օրինակ, ազգային նպատակ չկա. «Մենք որպես երկիր, որպես պետություն ո՞ւր ենք գնում, ի՞նչ արժեհամակարգ ենք որդեգրել, գոնե 25 տարի հետո ի՞նչ ենք ուզում ունենալ»:
Անդրադառնալով քաղաքական ուժերի՝ տնտեսության զարգացման վերաբերյալ ծրագրերին, Միքայել Միքայելյանն ասաց, որ տնտեսական աճի զարգացման ամենաբարձր շեմը սահմանել են 6-7 տոկոս, սակայն, միևնույն է, դա առաջընթաց չի ապահովում. «6-7 տոկոս աճն ի՞նչ է տալու: Մեկ շնչի հաշվով ՀՆԱ-ն մոտ 3500 դոլար է, իսկ եվրոպական միջին մակարդակի երկրներում ՀՆԱ-ն մեկ շնչի հաշվով 20 000 դոլարից ավել է: Այսինքն՝ այս տեմպերով զարգանալու դեպքում մենք կկարողանանք եվրոպական երկրների մակարդակին հասնել մոտ տասը տարի անց:
Դա նշանակում է, որ 20-25 տարի հետո մենք կհասնենք միջին եվրոպական երկրի մակարդակին,իսկ դա նշանակում է, որ կենսամակարդակի բարձրացում, տարածաշրջանում մեր տեղը պահելու հնարավորություն մենք չենք ունենա նման տեմպերով, էլ չեմ ասում 2-3 տոկոս տնտեսական աճի արձանագրման մասին»:
Անդրադառնալով մենաշնորհների դեմ պայքարի վերաբերյալ կուսակցությունների խոստումներին, Միքայել Միքայելյանն ասաց, որ ոչ ոք չի հավատում մենաշնորհների դեմ պայքարին. «Առհասարակ կա՞ աշխարհում երկիր, որտեղ մենաշնորհ չկա: Նման հարցադրման բարձրացումը պոպուլիզմի դրսևորում է, ոչ ավելին: Մենաշնորհը պետք չէ վերացնել, որ ուզես էլ չես կարող, մենաշնորհը պետք է բերել օրենքի դաշտ, վերահսկողություն սահմանել, ինչպես զարգացած երկրներն են անում»:
Տնտեսագետի խոսքով՝ տնտեսության զարգացման համար հաջորդ կարևոր խնդիրը կոռուպցիան է. «Եթե այստեղից մենք չենք բռնում մեխը, մենք երկիրը չենք կարող բարձրացնել, այստեղից սկսողն էլ իշխանությունն է, կամ նա, ով կգա իշխանության; Այստեղ ընդամենը պետք է քաղաքական կամք դրսևորել»,- ասաց տնտեսագետը՝ հավելելով, որ անկախ մարմնի ստեղծմամբ հարցերը չեն լուծվում: