Զինծառայող կնոջ կողմից 1 տոննա թորած նավթ բերելու համար 4000 դոլար գումարին խաբեությամբ տիրանալու գործը Վճռաբեկում է, առգրավված 50 լիտր նավթն էլ անհետացել է
2014-ի նոյեմբերի 6-ին Ռոզա Ավագյանը ՀՀ քննչական կոմիտե հաղորդում է ներկայացրել, որ պայմանագրային զինծառայող Իրինա Սարգսյանը, իր ծառայության վայրից՝ պաշտպանության նախարարության «Էրեբունի օդանավակայանի» տարածքում գտնվող զորամասից մեկ տոննա թորած նավթ բերելու համար Ռոզա Ավագյանից և նրա ամուսնուց` Գրիգոր Միքայելյանից, վերցնելով 4.000 ԱՄՆ դոլարին համարժեք գումար, տարբեր պատճառաբանություններով չի բերել խոստացված նավթը և խաբեությամբ տիրացել է իրենց գումարին:
Այս մասին Tert.am-ի հետ զրույցում ասաց գործով տուժող Ռոզա Ավագյանի ներկայացուցիչ Ստեփան Ոսկանյանը:
«Քրեական գործը վերաբերում է 2014 թվականին ավիացիոն նավթին: Իմ վստահորդը՝ Ռոզա Ավագյանը պարբերական հիվանդությունից բուժվելու նպատակով դեղամիջոցներ է գնել Մոսկվայից: Նրա ամուսնու եղբոր կինը , ով մասնագիտությամբ բուսաբույժ է, խորհուրդ է տվել, որպեսզի այդ դեղը թանկ չառնի, այլ ինքը կբերի թորած նավթ և կտա բաղադրատոմս , որով հնարավոր կլինի պատրաստել համապատասխան դեղորայքը: Այդ կինը՝ Իրինա Սարգսյանը, պաշտպանության նախարարության Էրեբունի օդանավակայանի զորամասում է աշխատում որպես կապի մասնագետ»,-ասաց Ոսկանյանը:
Փաստաբանը հայտնեց, որ սկզբում Իրինա Սարգսյանը բերել է 50 լիտր նավթ, այնուհետև 4000 դոլար գումար է վերցրել 1 տոննա ավիացիոն նավթ բերելու համար.«Իրինա Սարգսյանը նախապես 4000 դոլարին համարժեք դրամ է վերցնում Ռոզա Ավագյանի տնից, որպեսզի մեկ տոննա նավթ հավաքի և բերի: Նավթը չի բերում, գումարը չի վերադարձնում և հարուցվում է քրեական գործ քրեական օրենսգրքի 178-րդ հոդվածի 1-ին մասի հատկանիշներով, սակայն ամբողջ գործի ընթացքում Իրինա Սարգսյանին ոչ մի մեղադրանք չներկայացվեց: Իրինա Սարգսյանը հարցաքննվեց որպես վկա: Հիմա վերջին քրեական գործը, որ հարուցվել էր և որը բողոքարկվել է պաշտոնատար անձանց կողմից կեղծիք կատարելու փաստով է»:
Փաստաբանի խոսքով՝ դրանից հետո Ռոզա Ավագյանը դիմում է զինվորական քննչական գլխավոր վարչություն, հաղորդում է ներկայացնում հանցագործության վերաբերյալ, հարուցվում է քրեական գործ, որի շրջանակներում բազմաթիվ ապօրինություններ են տեղի ունենում Ռոզա Ավագյանին էլ քրեական գործի շրջանակներում ճանաչում են տուժող, հարցաքննում են բոլոր քննիչներին, որովհետև գործով վկա Գրիգոր Միքայելյանը, պարբերաբար բողոքներ են հայտնել քննիչների դեմ:
«Արդյունքում, 2016թ-ի փետրվարի 24-ին ՀԿԳ ավագ քննիչ Սամվել Սարգսյանի կողմից կայացվել է քրեական գործով քրեական հետապնդում չիրականացնելու և վարույթը կարճելու մասին որոշում, որը տուժող կողմը օրենքով սահմանված ժամկետում և կարգով բողոքարկել է ՀՀ զինվորական դատախազություն: Բացի այդ, նա էլ ամեն ինչ անում է, որ գործը փակվի և որոշ ժամանակ առաջ գործով վկա Գրիգոր Միքայելյանին կանչում և առաջարկում է վերցնել իր մոտ առկա 2000 դոլարը , որպես պարտքի գումար: Գրիգոր Միքայելյանը հրաժարվում է վերցնելուց, ասելով, որ իրենից խաբեությամբ գումար է վերցրել միայն Իրինա Սարգսյանը և իր եղբայրն իրեն պարտք չէ: Դրանից հետո գործը կարճվում է, հիմա արդեն այդ գործը Վճռաբեկ դատարանի քննության փուլում է»:
Ստեփան Ոսկանյանը հայտնեց, որ այդ գործի քննության ընթացքում Գրիգոր Միքայելյանը հաղորդում է ներկայացնել նախաքննությունն իրականացրած քննիչների ապօրինությունների դեմ.«Հարուցվում է քրեական գործ, որի վարույթը նույնպես կարճվել է, նույն պատճառաբանությամբ, որ քննիչների կողմից ապօրինություններ թույլ չեն տրվել: Նորից այդ որոշումը մենք բողոքարկում ենք դատական կարգով և հիմա այն գտնվում է Վերաքննիչ դատարանի քննության փուլում»:
Բացի այդ, փաստաբանը հայտնեց, որ Գրիգոր Միքայելյանը դիմում է ներկայացրել, որ հետ տան դատարանի վճռով առգրավված 50 լիտր նավթը, սակայն նավթը չկա, մնացել է ընդամենը 7 լիտր:
«Բացի այդ, փորձաքննություն է կատարվում, և ըստ փորձագետի եզրակացության՝ այդ նավթը չի հանդիսանում ավիացիոն ռեակտիվ շարժիչների համար վառելիք, այլ ընդամենը դիզելային վառելիք է: Գրիգոր Միքայելյանը իր մոտ մնացած 1 լիտր չափաբաժինը ներկայացնում է անկախ փորձագիտական կենտրոն լաբորատորիա և տալիս են մեկ այլ եզրակացություն, որ այն հանդիսանում է ավիացիոն վառելիք: Մենք միջնորդել ենք, որ հակասական եզրակացությունների առկայության պարագայում արվի կրկնակի փորձաքննություն, ինչը մերժվեց »,-ասաց փաստաբանը, հավելելով, որ նավթը չկա, անգամ տարաները չկան, որով այն առգրավվել է.«Նավթն անհետացել է»:
Հարցին, թե նախաքննության ընթացքում չի՞ ճշտվել, թե մեկ տոննա նավթ որտեղից պետք է բերվեր և որտեղի՞ց է բերվել 50 լիտր թորած նավթը, փաստաբանն ասաց, որ նախաքննական մարմինը բավարարվել է մի քանի հարցումներ ուղղելով և օդանավակայանի պաշտոնակատար անձանց հարցաքննություններով.« Այսինքն, պաշտոնատար անձանց հարցաքննել են, թե հնարավոր է, որ ձեզ այդ քանակով նավթ դուրս բերեն, ասել են՝ ոչ, որովհետև իրենք էլ կարող էին պատասխանատվության ենթարկվել»:
Հարցին, թե ի՞նչ էին անելու 1 տոննա նավթը, փաստաբանն ասաց, որ զուտ բիզնես նպատակ է հետապնդել: