Մոտենում ենք ՀՀ-ԵՄ բանակցությունների եզրափակիչ փուլին. Նալբանդյան
Հայաստանի և Եվրամիության միջև մեկնարկած նոր իրավական փաստաթղթի շուրջ բանակցությունների հաջորդ փուլը նախատեսված է փետրվարին: Լրագրողների հետ զրույցում այս մասին ասաց ՀՀ արտաքին գործերի նախարար Էդվարդ Նալբանդյանը:
«Կարծում եմ, որ մոտենում ենք բանակցությունների եզրափակիչ փուլին: Համարյա թե համաձայնեցված է ջախջախիչ մեծամասնությունը բոլոր այն դրույթների, գլուխների, որոնք ընդգրկված են նոր համաձայնագրի մեջ՝ թե՛ քաղաքական, թե՛ տնտեսական մասով»,- ասաց Է. Նալբանդյանը:
Ըստ ԱԳ նախարարի՝ մոտ օրերս ԵՄ-ից Հայաստան է ժամանելու կարևոր պատվիրակություն, որի մեջ ընդգրկված են նաև ՀՀ-ԵՄ միջև իրավական փաստաթղթի շուրջ բանակցողները:
«Դա էլ մեզ հնարավորություն կտա որոշ ճշգրտումներ անել այս բանակցային գործընթացում: Կարծում եմ, որ մոտ ապագայում հնարավորություն կունենանք հայտարարել, որ մենք եզրափակում ենք այս բանակցությունների գործընթացը»,- նշեց Էդվարդ Նալբանդյանը: