Հայաստանի և Ադրբեջանի արտգործնախարարների հանդիպումը տեղի կունենա, եթե Ադրբեջանը դրանից չհրաժարվի. Է. Նալբանդյան
Մյունխենի անվտանգության կոնֆերանսի նախաշեմին ԵԱՀԿ Մինսկի խմբի համանախագահների կողմից առաջարկվել է հանդիպում անցկացրել Հայաստանի և Ադրբեջանի արտաքին գործերի նախարարների միջև: Լրագրողների հետ զրույցում այս մասին հայտնեց ՀՀ արտաքին գործերի նախարար Էդվարդ Նալբանդյանը:
«Մենք, իհարկե, երբևէ չենք հրաժարվում որևէ հանդիպումից, արտգործնախարարների կամ այլ մակարդակով: Բայց ինչ վերաբերում է Ադրբեջանի նախարարի հանդիպմանը, այս պահին չեմ կարող հաստատել, այո, Հայաստանը համաձայն է, բայց ո՞վ գիտի՝ ինչ խաղեր կտա այս անգամ Ադրբեջանը»,– ասաց նա:
Էդվարդ Նալբանդյանը նշեց, որ պայմանավորվում են մի բան, սակայն հետո վերջին րոպեին ադրբեջանական կողմը հայկական կողմին մեղադրում է պայմանավորվածություններից հրաժարվելու մեջ։
«Սա աբսուրդ է: Նախորդ անգամ Համբուրգում հայտարարեցին, թե հանդիպում չի կայացրել, չնայած՝ հանդիպում կայացել էր: Ասացին, թե հանդիպումը եղել է ճաշի ընթացքում: Ի՞նչ տարբերություն, ճաշի ընթացքում էր, թե ոչ, ինչ է՝ ճաշի ժամանակ նստել էինք և չէ՞ինք հանդիպել, իրար չէի՞նք տեսել»,- նշեց ՀՀ ԱԳ նախարարը:
Էդվարդ Նալբանդյանը շեշտեց, որ Հայաստանի և Ադրբեջանի նախարարների մակարդակով հանդիպումը տեղի կունենա, եթե Ադրբեջանը դրանից չհրաժարվի: