Թուրքիայի գործողությունները Սիրիայում սեպ են խրել Անկարայի և Վաշինգտոնի հարաբերություններում. WSJ
Ամերիկյան The Wall Street Journal թերթն անդրադարձ է կատարել Սիրիայի տարածքում Թուրքիայի սկսած գործողություններին ու դրանից հետո ԱՄՆ - Թուրքիա հարաբերություններում առաջացած նոր լարվածությանը:
Թերթը լույս է սփռում ներկայում Սիրիայում ստեղծված նոր իրավիճակի վրա:
«Երբ անցյալ շաբաթ Թուրքիան Սիրիայի տարածքում սկսեց հարվածներ հասցնել «Իսլամական պետություն» խմբավորման դիրքերին, ԱՄՆ-ն բարձր գնահատեց Անկարայի այս քայլն ու այն անվանեց ԱՄՆ-ի և Թուրքիայի միջև սերտ համագործակցության ևս մի արդյունք: Մինչդեռ պաշտոնական քաղաքականության հետնաբեմում ԱՄՆ-ի ու Թուրքիայի միջև ՆԱՏՕ-ի շրջանակներում բանակցությունները դադարեցվել են»,- գրում է թերթը։
Մինչ ԱՄՆ-ն գաղտնի պլան էր մշակում, թե ինչպես են ԱՄՆ-ի հատուկ ուժերը միանալու Սիրիայում թուրքական ԶՈՒ-ին, Անկարան միակողմանի կերպով «սեղմեց կոճակն» ու սկսեց ռազմական գործողությունները՝ առանց Վաշինգտոնին զգուշացնելու:
Ինչպես գրում է The Wall Street Journal-ը, երբ Սիրիայում բախումներ սկսվեցին թուրքերի և ԱՄՆ-ի աջակցությունը վայելող քրդական զինված խմբավորումների միջև, Պենտագոնը սկսեց կոչեր հնչեցնել այն մասին, որ երկու կողմերն էլ հետ քաշվեն:
Ամերիկացի պաշտոնյաները հայտարարում են, որ Սիրիայում թուրքերի և քրդերի բախումը նոր մարտահրավեր է ԱՄՆ-ի համար, քանի որ այս դեպքում ստեղծվում է մի իրավիճակ, երբ դաշնակիցը պետք է դուրս գա դաշնակցի դեմ, այլ ոչ թե միասին պայքարեն ԻՊ-ի դեմ:
Համակարգվածության այս խախտումն ավելացնում է լարվածությունն ԱՄՆ-ի և Թուրքիայի միջև, որոնց հարաբերություններն առանց այդ էլ լավ վիճակում չեն գտնվում Թուրքիայում հեղաշրջման տապալված փորձից հետո:
Ամերիկացի պաշտոնատար դեմքերը զգուշացրել են թուրք զինվորականներին, որ չեն աջակցելու թուրքերին դեպի Սիրիայի հարավ առաջ գնալուն ուղղված գործողություններում: Միևնույն ժամանակ, հայտարարել են, որ աջակցում են դեպի արևմուտք շարժվող թուրք զինվորականներին:
Դրա հետ մեկտեղ Reuters գործակալությունը հաղորդում է, որ ԱՄՆ ԶՈւ-ն երկու խոշոր օդային հարված է հասցրել ԻՊ-ի դիրքերին Սիրիայի սահմանամերձ Ջերաբլուսի մոտակայքում:
Ռուսական Взгляд-ը հիշեցնում է, որ երկուշաբթի օրն Օբամայի ներկայացուցիչ Բրեթ ՄքԳարկը հայտարարել է, որ իրենք ճիշտ չեն համարում Սիրիայի հյուսիսում ապստամբ ուժերի և թուրքական ԶՈՒ-ի բախումները:
Թուրքիայի արտգործնախարար Մևլութ Չավուշօղլուն էլ իր հերթին հայտարարել է, որ եթե Սիրիայի քրդական ուժերը հետ չքաշվեն դեպի Եփրատի արևելյան ափ, ապա կդառնան թուրքական ԶՈՒ-ի զինված գործողության թիրախ:
Կիրակի օրը քրդերը թուրքական ԶՈՒ-ին մեղադրել են Ջերաբլուսի մոտակայքում խաղաղ բնակիչների ուղղությամբ կրակելու համար: Նշվում էր, որ կա ավելի քան 30 զոհ:
Դրանից առաջ թուրքական ԶՈՒ-ի տանկերը գնդակոծության էին ենթարկվել այն տարածքներից, որոնք գտնվում են Սիրիայի քրդական ազգային խմբավորումների վերահսկողության տակ:
Բացի այդ, թուրքական ԶՈՒ-ի դեմ բաց էր թողնվել 4 հրթիռ, որոնք պայթել են Թուրքիայի Դիարբեքիր քաղաքի օդանավակայանի տարածքում: Թուրքիայի իշխանությունները դրանում մեղադրել են «Քուրդիստանի աշխատավորական կուսակցություն» խմբավորման զինյալներին։