Սահմանադրական փոփոխություններով Ալիևը ցանկանում է Ադրբեջանը վերածել խանության. սահմանադրագետ
Ադրբեջանում, միանշանակ, ամրապնդվում է բռնապետությունը. Tert.am-ի հետ զրույցում, խոսելով հարևան երկրում սպասվող սահմանադրական փոփոխությունների մասին, ասաց սահմանադրագետ Գաբրիել Բալայանը:
«Իրենց սահմանադրությամբ՝ սահմանադրական նախագծերին եզրակացություն է տալիս սահմանադրական դատարանը։ Փաստորեն, հիմա այն մասնակից կամ հանցակից է դառնում այդ ամենին: Նաև՝ սահմանադրությամբ փոխնախագահի պաշտոն են սահմանում, որը հետխորհրդային շրջանում պարզ դարձավ, որ ընդհանրապես չպետք է լինի, քանի որ, եթե գոյություն ունի վարչապետ, փոխնախագահի պաշտոնը վերանում է»,- ասաց սահմանադրագետը:
Նշենք, որ Ադրբեջանում մեկնարկել է սահմանադրական փոփոխությունների հանրաքվեի նախապատրաստական փուլը։ Հուլիսի 18-ին Ադրբեջանի նախագահ Իլհամ Ալիևի կողմից Սահմանադրական դատարան փոխանցված նախագծի համաձայն՝ առաջարկվում է գործող նախագահի պաշտոնավարման ժամկետը երկարաձգել 7 տարի ժամկետով։
Նոր սահմանադրության նախագծով առաջարկվում է նաև նվազեցնել նախագահի թեկնածուի տարիքային շեմը, որը հիմա 35-ն է. «Այդպիսով Ալիևը ցանկանում է իր ընտանիքի անդամներից մեկին նշանակել փոխնախագահ, հետո նախագահ: Ենթադրում եմ, որ դրա համար նախատեսել է զավակներին»,- նշեց Գաբրիել Բալայանը:
Նա ավելացրեց, որ նախագծից նկատելի է, որ քաղաքացիների իրավունքների հստակ սահմանափակում է լինելու. «Իրականում Ալիևը սահմանադրական այս փոփոխություններով ցանկանում է Ադրբեջանը վերածել խանության, դեռ 2003 թվականից նույն մարդն է իշխանության գլխին»:
Սահմանադրագետը հիշեցրեց նաև, որ դեռևս 2009 թվականին Ադրբեջանում կայացած սահմանադրական փոփոխությունների ժամանակ, երբ վերացվեց նախագահի վերընտրվելու սահմանափակումը, Վենետիկի հանձնաժողովը բացասական եզրակացություն տվեց, սակայն տեղի իշխանությունները դա հաշվի չառան:
«Սա նաև Ադրբեջանի իշխանությունների արձագանքն է իրենց երկրի օրեցօր վատթարացող տնտեսական վիճակին. այն է՝ կենտրոնացնել իշխանությունը և շարունակել ռեպրեսիաները: Թուրքմենիայում անգամ նման սահմանադրություն չկա։ Ադրբեջանը ժողովրդավարական գործընթացների առումով ամենափակ հետխորհրդային երկիրն է»,- ասաց նա:
Հիմա արդեն, ըստ Գաբրիել Բալայանի, նկատելի է միջազգային կառույցների բացասական արձագանքը Ադրբեջանում սպասվող սահմանադրական փոփոխություններին. «Human Rights Watch-ն է բացասական արտահայտվում, Constitusion.net-ում է տեսանելի, որ կա բացասական վերաբերմունք: Սպասվում է, որ միջազգային կառույցների կողմից կլինեն նաև հայտարարություններ»: