Պատերազմն ինքնասպանություն կլինի Ադրբեջանի համար. Կոնստանտին Զատուլին
Լայնածավալ պատերազմի դիմելն ինքնասպանություն կլինի Ադրբեջանի համար: «Ноев Ковчег» թերթին տված հարցազրույցում այս կարծիքն է հայտնել ԱՊՀ երկրների ինստիտուտի տնօրեն Կոնստանտին Զատուլինը:
«Ադրբեջանը մշտապես հայտարարում է Լեռնային Ղարաբաղի խնդիրը ռազմական ճանապարհով լուծելու պատրաստակամության մասին: Իրականում Ադրբեջանն իհարկե բլեֆ է անում, որովհետև լավ է հասկանում՝ իր ներկայիս տնտեսական հնարավորությունները խոցելի են: Նման ռիսկի դիմելը, որն անխուսափելիորեն կբերի արտաքին ուժերի միջամտության, ինքնասպանություն կլինի՝ այդ թվում նաև Ադրբեջանի քաղաքական ռեժիմի համար: Այնուամենայնիվ, Ադրբեջանում իրենք իրենց փակուղի են դնում ռազմական հռետորաբանությամբ և ռազմական պատրաստություններով»,- ասել է նա:
Զատուլինը վստահություն է հայտնել, որ «առանց Լեռնային Ղարաբաղի Հանրապետության վերջնական խոսքի՝ հակամարտության ոչ մի կարգավորում հնարավոր չէ»:
Նա նշել է, որ բացի կողմերի միջև վստահության բացակայությունից՝ կա նաև անվստահության մեկ այլ մակարդակ խնդրով զբաղվող ԵԱՀԿ Մինսկի խմբի համանախագահների միջև:
«Չկա Մինսկի խմբի համանախագահների միջև վստահություն, իսկ դրանք Ռուսաստանն են, ԱՄՆ-ն և Ֆրանսիան: Չնայած թվում էր, որ հենց Ղարաբաղյան հարցում այդ երկրների դիրքորոշումները մոտ են քան երբևէ, նրանք ռազմական լուծման կողմնակիցներ չեն, նրանց համար բացարձակ հրամայականը ուժի կիրառումից հրաժարվելն է և բանակցային գործընթացի շարունակությունը»,- ասել է նա։
Զատուլինը նշել է, որ հակամարտության հարցում ապակայունացնող գործոն է հանդիսանում Թուրքիան, որը տեղի տվեց Ադրբեջանին Հայ-թուրքական արձանագրությունների դեպքում:
Նրա խոսքով՝ Ռուսաստանն իր հերթին գիտակցում է հակամարտության կարգավորման ողջ պատասխանատվությունը:
«Պահպանելով Հայաստանի հետ դաշնակցային հարաբերությունները՝ նա փորձում է լավ հարաբերություններ պահպանել նաև Ադրբեջանի հետ: Ռուսաստանը ոչ միայն հետ է պահում Ադրբեջանին հակառուսական ճակատում հայտնվելուց, այլև ելնում է նրանից, որ Ադրբեջանի հետ լավ հարաբերությունները ձեռնտու են վերջին հաշվով ոչ միայն այդ երկրի և Ռուսաստանի համար, այլև Հայաստանի համար՝ հետ պահելով Ադրբեջանին անշրջահայաց քայլերից: Ցավոք, Ռուսաստանի այդ տրամաբանությունը փորձարկման ենթարկվեց ապրիլին, երբ ռուս-թուրքական հարաբերությունների կտրուկ վատթարացման ֆոնին Ադրբեջանը որոշեց ռազմական արկածախնդրության դիմել»,- ասել է Զատուլինը՝ նշելով, որ հնարավոր է, որ Ռուսաստանի կողմից մատակարարվող զենքի պատճառով ուժերի հավասարակշռությունն իսկապես խախտվել էր, բայց, միևնույն է, տեղի ունեցածի ողջ պատասխանատվությունն Ադրբեջանինն է, այլ ոչ Ռուսաստանինը:
«Ռուսաստանն արել է եզրակացություններ՝ առաջին հերթին ստիպելով դադարեցնել ռազմական գործողությունները, իսկ երկրորդ հերթին՝ հրապարակայնորեն հայտարարելով Հայաստան սպառազինության մատակարարումների մասին»,- ասել է նա: