Գարեջրի փառատոնը Երևանում՝ արդեն 3–րդ անգամ
Կարապի լճի հարակից տարածքում երաժշտական ուրախ ռիթմերով մեկնարկել է Երևանի գարեջրի ամենամյա 3-րդ փառատոնը, տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:
Ժամը 19:00-ին Երևանի քաղաքապետի օգնական Մարիա Բարաղամյանի և քաղաքապետարանի մշակույթի և տուրիզմի վարչության պետ Ռուբեն Հովհաննիսյանի ողջույնի խոսքով ազդարարվել է փառատոնի պաշտոնական բացումը:
Երևանի գարեջրի փառատոնում ներկայացված է շուրջ 15 ընկերությունների 20 տաղավար: Փառատոնի ընթացքում տաղավարներում կանցկացվեն արագ ըմպելու, ձողիկով ըմպելու, նրբերշիկի համը որոշելու, գետնանուշն արագ մաքրելու, խեցգետինն արագ ուտելու և այլ մրցույթներ, որոնց կարող են մասնակցել բոլոր այցելուներն ու ստանալ անակնկալ նվերներ ինչպես Երևանի քաղաքապետարանի, այնպես էլ մասնակից ընկերությունների կողմից:
Ժամը 22:00-23:00-ն կանցկացվի փառատոնի փակման արարողությունը, որի ժամանակ բոլոր մասնակից ընկերությունները կստանան մասնակցության շնորհակալագրեր՝ Երևանի քաղաքապետ Տարոն Մարգարյանի անունից:
Փառատոնային երեկոն կուղեկցվի համերգային հագեցած ծրագրով: Կենդանի հնչողությամբ հանդես կգան «Alexandrapol» և «Boeing» նվագախմբերը, իսկ երեկոն կեզրափակվի DJ Soprano-ի կատարումներով:
Հիշեցնենք, որ «Երևանյան ամառ» եռամսյա միջոցառումների ծրագրով անցկացվող Երևանի գարեջրի փառատոնը Երևանի քաղաքապետարանի «Համով-հոտով Երևան» և «Երևան ՏԱՐԱԶֆեստ» խոշոր փառատոներից հետո երրորդն է: Այն նախորդ երկուսի նման արդեն հասցրել է սիրվել ինչպես մայրաքաղաքի բնակիչների, այնպես էլ քաղաքի հյուրերի կողմից:
Փառատոնի այցելուների թիվը նախորդ տարիներին գերազանցել է 4000-ը: Երևանի գարեջրի փառատոնը, որն անցկացվում է արդեն երրորդ անգամ, Երևանի զբոսաշրջային ծրագրի կարևոր բաղադրիչներից է և ուրույն նպաստն է բերում մայրաքաղաքում միջոցառումային զբոսաշրջության զարգացմանը:
Երևանի գարեջրի փառատոնի նպատակը հանրությանը հայկական գարեջրի առանձնահատկություններին ծանոթացնելն ու հայկական շուկայում գարեջրի արտադրությամբ զբաղվող ընկերություններին մեկ հարթակի ներքո համախմբելն է։
Փառատոնին մասնակցում են «Երևանի գարեջուր» գործարանը՝ «Կիլիկիա», «1952», «Yerevan», էքսքլյուզիվ մուգ ապրանքանիշերով, «Գյումրի» և «Ալեքսանդրապոլ» գարեջրի գործարանները, որոնք ներկայացնում են Gyumri, Aleksandropol, Ararat, Chezh ապրանքատեսակները, «Կոտայք» գարեջրի գործարանը, «Beer Academy» (Գարեջրի ակադեմիա) փաբ-գարեջրի լաբորատորիան, «Յանկի» փաբը, «Կառլոֆֆ» չեխական գարեջրատուն-ռեստորանը, Հայ խեցգետնակերների ֆեդերացիան, «Բիռ մանիա» գարեջրատուն-սրճարանը, «Նավավար» ձկնալի ըմպենարանը:
Փառատոնին այս տարի առաջին անգամ մասնակցում է ԼՂՀ էկոնոմիկայի նախարարության զբոսաշրջության վարչությունը՝ «Ղարաբաղ. թաքնված գանձ» տաղավարով՝ ներկայացնելով Արցախի զբոսաշրջային ներուժը: