Չիկագոյում 1 օրում փողոցային հարձակումների զոհ է դարձել 9 մարդ
ԱՄՆ-ի Չիկագո քաղաքում արձանագրվել է կրակոցների հետևանքով 1 օրում գրանցված զոհերի՝ վերջին տարիների ամենաբարձր ցուցանիշը, հայտնում է Chicago Sun Times-ը՝ հավելելով, որ անցած գիշեր քաղաքի տարբեր հատվածներում տեղի ունեցած փողոցային հարձակումները դարձել են 9 մարդու մահվան պատճառ:
Ընդհանուր առմամբ, իրավապահները փաստել են, որ վերջին օրերին քաղաքում կտրուկ աճել է փողոցային հանցագործությունների թիվը:
Ինչպես ավելի վաղ հայտնել է Tert.am-ը, անհայտ անձինք կրակ են բացել մեքենայի ուղղությամբ, որում եղել է 30-ամյա տղամարդ և 26-ամյա կին: Տղամարդը սպանվել է գլխին հասցված կրակոցի հետևանքով, նրա ընկերուհին վիրավորվել է ոտքից և տեղափոխվել է քաղաքային հիվանդանոց:
Նմանատիպ հանգամանքներում այլ թաղամասում գնդակահարվել է Չիկագոյի 17-ամյա բնակիչ: Նա մահացել է հիվանդանոց տեղափոխվելուց 15 րոպե անց:
Oգոստոսի 13-ի գիշերը քաղաքում ևս մոտ 6 հարձակումներ են տեղի ունեցել, որոնց հետևանքով 7 մարդ է վիրավորվել: Հանցագործությունների բնույթը փաստում է, որ դրանք իրականացրել են փողոցային ավազակախմբերը: