Ազատության հրապարակում մեկնարկել է հանրահավաք (թարմացվում է)

21.31

Ելույթ ունեցավ նաև «Ղարաբաղ» կոմիտեի նախկին անդամ Աշոտ Մանուչարյանը: Նա նշեց, որ ներկայիս Սահմանադրությունը պետք է փոխվի։

«Այդ Սահմանադրությունը պետք է փոխի հենց ժողովուրդը, հենց այս հրապարակում»,- ասաց նա` նշելով, որ մենք այլ ճանապարհ չունենք:

Նա հիշեց «Սասնա ծռերին» սնունդ տարած Արթուր Սարգսյանի մասին և հիշեցրեց, որ այսօր նրա ծննդյան օրն է, շնորհավորեց նրան՝ ասելով, որ նրա տեսակը պետք է ամեն օր ծնվի:

Նշենք, որ հանրահավաքին պետք է մասնակցելու գար նաև «Սասնա ծռեր» խմբավորման անդամ Ալեք Ենիգոմշյանը, ով ազատ էր արձակել երեկ: Ավելի ուշ նա զանգել, զգուշացրել էր, որ իրեն վատ է զգում, չի կարող գալ:

21.18

Քիչ առաջ Երևանի Ազատության հրապարակում մեկնարկեց հերթական հանրահավաքը: Ելույթ են ունենում տարբեր քաղաքացիներ, որոնք սատարում են «Սասնա ծռեր» խմբավորմանը: Ելույթ ունեցավ Գայանե Գասպարյանը:

Նա խոսեց երկրում առկա տարբեր խնդիրներից, անդրադարձավ նաև Հայաստանի արտաքին կյանքում տեղի ունեցող իրադարձություններին:

«Չկան Հայաստանի համար բարեկամներ, կան թշնամիներ»,- ասաց նա՝ մեղադրելով  Ռուսաստանին, որ գնացել է մեր թշնամու մոտ:  Ըստ նրա՝ այդ հանդիպման պատճառով հնարավոր է` մենք կորուստներ ունենանք:

Նա նշեց, որ իրեն առաջարկում են կուսակցության անդամ դառնալ, սակայն նա մերժել է՝ համարելով, որ իր կուսակցությունն իր ազգն է: «Պաշտոնյա լինելը նշանակում է վարկաբեկված լինել»,- ասաց նա:

Գայանե Գասպարյանը նշեց, որ այլ երկրից է (Հոլանդիա) եկել Հայաստան, հիմա էլ ցանկանում է այստեղ մնալ, ապրել և զգալ այս երկրի էներգետիկան: