Հիմնական խնդիրն այսօր պետք է լինի ԼՂՀ ժողովրդի անվտանգության հարցը. Լարիսա Ալավերդյան
«Ընդդեմ իրավական կամայականությունների» ՀԿ նախագահ, արցախյան հարցով փորձագետ Լարիսա Ալավերդյանը Tert.am-ի հետ զրույցում անդրադարձել է ՀՀ Նախագահ Սերժ Սարգսյանի՝ հասարակության տարբեր շերտերի ներկայացուցիչների հետ հանդիպման ժամանակ ելույթին, որտեղ անդրադարձել է նաև ղարաբաղյան հարցին և նշել, որ Լեռնային Ղարաբաղի խնդրի կարգավորման ճանապարհին միակողմանի զիջումներ չեն լինելու և Լեռնային Ղարաբաղը երբեք չի լինելու Ադրբեջանի կազմում:
Ըստ Լարիսա Ալավերդյանի՝ այս հայտարարությունը ամենևին էլ չի փարատում հասարակության որոշ խավի մտահոգությունները:
«Երբ ասվում է, թե երբեք չի լինելու Ադրբեջանի կազմում, տողատակերից դուրս են թողնում, թե ինչ են հասկանում ԼՂՀ-ի տակ, խնդիրը դրա մեջ է, այսինքն` գործող նախագահն իր խոսքի մեջ շրջանցում է հենց բուն խնդիրը, և այս առումով այս ելույթի այդ հատվածը, որևէ մի պարզաբանում չի մտցնում»,- ասաց նա և նշեց, որ պետք է հստակեցվի Կազանի, Մադրիդյան, և Բիշքեկի արձանագրությունները, քանի որ բոլոր փաստաթղթերը անհանգստություն են ներշնչում:
«Երկկողմանի զիջում ասածը չունի որևէ իմաստ, էությամբ այն առ ոչինչ է, որովհետև մենք դեռ չենք լսել Ադրբեջանից, թե ինչ զիջում է ինքը տեսնում, երկրորդը՝ երբ զիջում ենք ասում, խոսքը վերաբերում է տարածքների՞ն: Ադրբեջանը վստահ վաղուց արդեն 14 տարի է տարբերություն չի դնում ԼՂՀ-ի և ԼՂԻՄ-ի միջև և ասում է, թե այդ բոլորը պատկանում է Ադրբեջանին»,-ասաց նա:
Անդրադառնալով՝ Ֆրանսիայում Հայաստանի և Ադրբեջանի նախագահների միջև հանդիպման անհրաժեշտությանը, որի մասին խոսվում է, Լարիսա Ալավերդյանը նշեց, որ չի կարծում, որ այնտեղ փոխզիջումների մասին հարց կբարձրացվի: «Ֆրանսիան և ԱՄՆ պնդում են այն կետերը որոնք վերաբերում են անվտանգության աստիճանի բարձրացմանը, դիտորդական խմբին, և սահմանին խախտումն արձանագրող մեխանիզմների տեղադրման մասին»,-ասաց նա:
Նա նշեց, որ երկրի նախագահը պետք է հստակ ընդգծի և ուղերձով դիմի այդ միջնորդական խմբին, որ այսօր վաղ է խոսել հանգուցալուծման մասին այն էլ «պիղծ» մադրիդյան սկզբունքների ներքո, այլ պետք է խոսել ԼՂՀ-ում ապրող ժողովրդի անվտանգության և ՀՀ-ում սահմանամերձ գյուղերի անվտանգության աստիճանի բարձրացման հարցի մասին: Ըստ նրա մեր հիմնական խնդիրը դա պետք է լինի:
Ըստ փորձագետի՝ ոչ այնքան ապրիլյան դեպքերը և արձանագրված կորուստն է ազդել այն խոսակցությունների վրա, թե իշխանությունները «հող են հանձնում», որքան այդ կորստի վերաբերյալ տրված գնահատականը, թե դրանք ոչ ռազմավարական նշանակություն ունեցող են: «Այստեղ կա քաղաքական, էթնոհոգեբանական համատեքստ, որովհետև այդ գնահատականը շատ ցավագին է անդրադարձել և բոլորը անհանգստացել են: Ուղղակի հայտարարություններով, որ նախագահը ոչ միայն պաշտոն, այլ նաև կյանքը կարող է տալ, առկա մտահոգությունները չեն փարատում և լուծումը չեն տեսնում այն անհանգստացած խավը, որը կարողանում է տեսնել ամբողջական խճանկարը»,-ասաց նա: