Արագածոտնի նախկին մարզպետը մտավախություն չունի, որ կոռուպցիայի դեմ պայքարը իր դուռը կթակի
Արագածոտնի նախկին մարզպետ, ՀՀԿ-ական Սարգիս Սահակյանը մտավախություն չունի, որ կոռուպցիայի դեմ կառավարության հռչակած պայքարի շրջանակում իր անունը կարող է կապվել մարզում ընթացող քրեական գործերի հետ:
Այս մասին Tert.am-ի հետ զրույցում ասաց նախկին մարզպետը՝ պատասխանելով հարցին, թե կոռուպցիայի դեմ պայքար է հռչակված, նախկին ու ներկա պաշտոնյաներին բացահայտում ձերբակալում են, իր գործունեության հետ կապված նման մտավախություն չունի: «Չունեմ ու չեմ էլ ունենալու»,- հայտարարեց մարզպետը:
Հիշեցնենք, որ 2013-ից դատարանում քննվող քրեական գործով մեղադրանք է առաջադրվել Արագածոտնի մարզի 21 պաշտոնյայի ու քաղաքացու՝ Արագածոտնի մարզպետարանի կրթության, մշակույթի և սպորտի վարչության պետին, նրա աշխատակցին ու մարզի մի շարք դպրոցների տնօրեններին, ուսուցիչներին ու նրանց կաշառք տվող անձանց: Ընդ որում, մամուլի տեղեկություններով, դատաքննության ընթացքում պարբերաբար հնչել է նախկին մարզպետ Սարգիս Սահակյանի անունը։
Հստակեցմանը, թե կրթության ոլորտի հետ կապված Արագածոտնի մարզում քրեական գործեր են հարուցվել ու քննվում են դատարանում, Սահակյանը հակադարձեց. «Ասում եմ՝ մտահոգություն չունեմ ու չեմ էլ ունենալու: Իսկ ինչի՞ պետք է ունենամ, ես 20 տարի եմ աշխատել մարզում, 20 տարի օգնել եմ մարդկանց, ծրագրեր եմ իրականացրել: Նոր մարդ չեմ էդ մարզում, ու պետք է շարունակենք մեր աշխատանքը, շարունակենք աջակցել մարդկանց, օգնել, համայնքներին, դպրոցներին»:
Իսկ օրերս պաշտոնավարման 100 օրն ամփոփած Արագածոտնի նորանշանակ ՀՅԴ-ական մարզպետ Գաբրիել Գյոզալյանը ասուլիսի ընթացքում խոսել է մարզի կրթության ոլորտի ուսումնասիրության արդյունքներից՝ ասելով, որ մի շարք բացթողումներ են արձանագրվել, որոնց շտկման համար հստակ ժամկետ է սահմանվել, բացթողումներն էապես ուղղվել են: Աուդիտի արդյունքում 2 մլն 322 հազար դրամ գումար վերականգնվել է պետբյուջե: Ըստ նոր մարզպետի՝ մարզի տարբեր դպրոցներում 79-ը թափուր աշխատատեղ են հայտնաբերել, կրթօջախներ էլ են եղել որտեղ դրույքաչափերն ու ուսուցիչների թիվն անհասկանալի շատ են եղել:
Խոսելով դեռ 2013-ից ընթացող մարզի նախկին կրթության վարչության պետի դատաքննության մասին, ասել է, որ հետևում է դատարավարության ընթացքին ու սպասում ավարտին։
Թե ինչպես է գնահատում ներկա դաշնակցական մարզպետի գործունեությունը, հանրապետական նախկին մարզպետը չասաց. «Չեմ զբաղվում, անկեղծ ասած: Բացարձակապես չեմ զբաղվում նման հարցերով»: Հարցին, թե հարաբերությունները լարված են, պատասխանեց. «Ինչո՞ւ պիտի լարված լինեն, ես նույնիսկ էնքան ուրախ կլինեմ, որ իր գործերը հաջող լինեն մարզում, որովհետև ինչ էլ որ արվի, մեր մարզի բնակչության համար է արվում»:
Արագածոտնի նախկին մարզպետը համաձայն չէ, որ բավական պատկառելի ունեցվածք է կուտակել 20 տարիների ընթացքում: «Որտե՞ղ է էդ ունեցվածքը, ասեք տամ կեսը ձեզ: … Ինչո՞ւ պետք է մտավախություն ունենամ, շարունակել եմ ծառայել հայրենիքին ու շարունակելու եմ ծառայել որտեղ որ կգտնեն հարմար»:
Ասել է թե՝ սպասում եք նոր պաշտոնի՞, պատասխանեց. «Չեմ սպասում, ծնվել եմ, չեմ ծնվել, ինստիտուտն ավարտելուց հետո պաշտոնյա եմ եղել: Հիմա լավ եմ զգում, որ հանգիստ եմ ու շատ ժամանակ ունեմ զբաղվելու կուսակցական աշխատանքով»:
Նա, ի դեպ, չի թաքցնում, որ մեծ ներդրում է ունեցել Թալինի ՀՀԿ-ական քաղաքապետի վերընտրման հարցում: «Թալինի քաղաքապետին պաշտպանել եմ ես, անցկացրել ենք, եղել եմ իր շտաբի ղեկավարը»: