Հռոմի առաջին կայսեր մարմարե արձանի գլուխը վերադարձվել է Իտալիա (տեսանյութ)
Հռոմի առաջին կայսր Օկտավիանոս Օգոստոսի մարմարե արձանի գլուխը, որը գողացվել էր 40 տարի առաջ, կրկին վերադարձել է հայրենիք` Իտալիա:
Ինչպես նշում է reuters.com-ը, գողացվելուց հետո արժեքավոր նմուշը զարտուղի ճանապարհով տարվել էր արտասահման: Աղբյուրը մանրամասնում է, որ իտալացի իրավապահների ջանքերով արձանի գլխից զատ հայրենիք են վերադարձվել նախկինում գողացված պատմամշակութային կարևոր նշանակություն ունեցող այլ նմուշներ:
Իտալիայի արտգործնախարարության տարածած հաղորդագրությունում նշվում է, որ 45 սմ բարձրությամբ գլուխը 1970-ականներին Նեպիից գողացվելուց հետո հայտնվել է մասնավոր հավաքածուում: Այնուհետև գլուխը հայտնվել է Բրյուսելի Cinquantenaire թանգարանում: Մասնագետներն ուսումնասիրությունների արդյունքում պարզել են, որ դա Նեպիից գողացված օրիգինալ նմուշն է:
«Քառասուն տարուց ավելի արտաքսման մեջ անցկացնելուց հետո նա վերջապես տուն վերադարձավ: Բարի գալուստ, Օկտավիանոս»,- ասել է Նեպի շրջանի ղեկավար Պիետրո Սոլդատելին:
Տեսանյութը կարող եք դիտել այստեղ։