Պարտքը վերցնում եք, հավեսով ծախսում. Արամ Մանուկյանը վարկային համաձայնագրի մասին
Այնքան հանգիստ խղճով եք ասում՝ այդ կոպեկները հանգիստ հաշվում ենք, ուրիշի գումարն եք հաշվո՞ւմ, մեր քրտինքը չի չէ՞ դա, դա պարտք է, որ վերցնում եք հավեսով ծախսում եք: Այս մասին ասաց ՀԱԿ խմբակցության քարտուղար Արամ Մանուկյանն՝ անդրադառնալով քննարկվողն Սերժ Սարգսյանի կողմից ներկայացված Հայաստանի Հանրապետության և Եվրոպական ներդրումային բանկի միջև 2016 թվականի հունվարի 26-ին Երևանում և 2016 թվականի հունվարի 29-ին Լյուքսեմբուրգում ստորագրված «Հայաստանի Մ6 միջպետական ճանապարհ» Ֆինանսական պայմանագրի նախագծին, որի հիմնական զեկուցող և Տրանսպորտի և կապի նախարարի առաջին տեղակալ Արթուր Առաքելյանն է:
«Մեկ ու յոթ միլիարդ ծախսել եք Հյուսիս-հարավի համար, հիսուն միլիոն կծախսեք սրա համար, հիսուն միլիոն խնդրելու եք ասիականի համար: Եթե դա վաստակած գումար լիներ դուք իրավունք ունեիք ծախսելու, դուք ծախսում եք այն փողը, որը ժողովրդի ստեղծածը չէ»-ասաց նա և տնտեսական արդյունավետության հարց բարձրացրեց:
Արամ Մանուկյանը համաձայնեց, որ ճանապարհը ստրատեգիական է, սակայն հարց բարձրացրեց, թե քանի մեքենա է անցնում այդ ճանապարհով: «Խնդրում եք հստակ թվերով ասել, թե որքա՞ն է նախարարության վարկային փաթեթը, որքա՞ն եք վերցրել, որքա՞ն է ընթացքի մեջ, որքա՞ն է սպասվում»,-ասաց նա
Արթուր Առաքելյանն ի պատասխան մեջբերեց ՀՀ ֆինանսների նախարարության և այլ պատասխանատուների հայտարարությունը, ըստ որի, Հայաստանի արտաքին պարտքը վտանգավոր եզրաչափին դեռ չի մոտեցել և որևէ խնդիր չի սպառնում: «Սա նորմալ գործիք է վերցնել էժան և եկար փող և լուծել խիստ լուծման անհրաժեշտություն ունեցող խնդիրներ: Մենք ՀՀ-ում չենք հորինել դա»,-ասաց նա:
Ինչ վերաբերում է ծախսերի արդյունավետությանը, ապա նա ասաց, որ իրենց կառավարման ներքո գտնվող ծրագրերում վստահ են, որ ցանկացած ծախսված դրամային միավոր հասել է իր նպատակին: