Երեխաներ կան, որ փորձում են կապի միջոցներ բերել քննասենյակ. Բժշկական համալսարանում ընթանում է միասնական քննություն (լուսանկարներ)
Այսօր Բժշկական համալսարանում ընթանում է օտար լեզվի միասնական քննություն: Քննական կենտրոնի ղեկավար Հասմիկ Ավետիսյանը Tert.am-ի հետ զրույցում ասաց, որ պետք է մասնակցեին 178 դիմորդ, սակայն ինը դիմորդ չի ներկայացել: «Ակնհայտ երևում է, որ պատրաստված երեխաներ կան, բայց նրանց մեջ կան նաև այնպիսիները, որ փորձում են նայել կողք, արտագրել»,-ասաց նա և նշեց, որ մի քանի դիտողություններ արել են, իսկ կրկնվելու դեպքում կհեռացնեն:
«Փորձում են նաև կապի միջոցներ բերել, սակայն քանի որ շատ ուշադրիր ենք, առայժմ չի ստացվել օգտվել դրանցից»,-ասաց նա: Հասմիկ Ավետիսյանն ասաց, որ սա դիմորդների երկրորդ քննությունն է, առաջինը եղել է Հայոց լեզուն:
Ի դեպ, դիմորդներից Թագուհի Առաքելյանը նշեց, որ իրեն լավ չի զգում, թեև բժիշկը չափել է ճնշումը, և ամեն ինչ նորմալ է եղել: Նա իր հետ բերել էր հեռախոս, ինչը հայտնաբերել էին, և թեև նա պնդում էր, որ հեռախոսում ոչինչ չկա և չի օգտագործել, նույնիսկ կարող են ստուգել, սակայն, ամեն դեպքում, նա հեռացվեց քննությունից:
Նա նշեց, որ գիտեր, որ հեռախոսով չի կարելի քննության մասնակցել, բայց պարզապես հետը վերցրել էր: «Հարցերը դժվար չեն, սակայն մտածում եմ, որ կարող է սխալ լինեմ»,-ասաց քննական կենտրոնի ղեկավարը և նշեց, որ ցանկանում է մայրիկը զանգահարել:
Բժշկական համալսարանից դուրս երեխաներին սպասող ծնողները, հարազատներն առավել շատ անհանգիստ էին: Նրանց դժգոհությունը կապված էր ավագ դպրոցի տված կրթության հետ, քանի որ այն բավարար չեն համարում, որպեսզի երեխաներն առանց կրկնուսույցների կարողանան մասնակցել քննություններին: «Անհնար է դպրոցի գիտելիքներով նման բարդ քննության մասնակցել: Անիմաստ երեք տարի դպրոցներում երեխաներն անց են կացնում»-ասաց ծնողներից մեկը և նշեց, որ չի կարող ավագ դպրոցը կրկնուսույցներին փոխարինել, որովհետև բացարձակ ոչինչ չեն տալիս:
«Նախ պետք է թեթևացնեն շտեմարանները»,-ասաց մեկ այլ ծնող՝ նշելով, որ այդպիսով երեխաներին «զոմբիացնում» են:
Դիմորդներից մեկի տատիկը խնդիրը համարեց այն, որ երեխան շատ է խառնվում, ինչի պատճառով դժվարություններ են առաջանում: Ծնողների դժգոհությունը կապված էր նաև նրա հետ, որ Համալսարանի բակում տեղադրված մոնիտորում երեխաները պարզ չեն երևում, նրանց դեմքը աղաղված է: «Աղջիկ, տղա չի տարբերվում, և դիմացի նստած չորս հոգին է միայն երևում, ավելի լավ չէ՞ր ընդհանրապես չլիներ, որ ծնողներն այսպես չլարվեին»,-շեշտեց նա:
