Քննարկելով Հայոց ցեղասպանությունը. 3 նամակ՝ ուղղված The New York Times-ի խմբագրությանը
The New York Times թերթի՝ օրերս գրված «Այո, դա ցեղասպանություն է» խմբագրականը ցույց է տվել Բունդեսթագում Հայոց ցեղասպանության մասին բանաձևի քննարկմանն ու ձայների մեծամասնությամբ բանաձևի ընդունմանը Թուրքիայի արձագանքի ողջ անհեթեթությունը։ The New York Times-ում խմբագրին ուղղված նամակում այս մասին գրել է Ամերիկայի հայկական համագումարի գործադիր տնօրեն Բրայան Արդունին:
«Մարդկության դեմ հանցագործությունների վրա լույս սփռելը նախատեսված չէ Թուրքիայի համար խնդիրներ ստեղծելու համար, բայց կարևոր է ինքնին անցյալից սովորելու և ապագայում ցեղասպանությունները կանխելու համար: Թուրքիան տասնամյակներ շարունակ իր մերժողական արշավի փոխարեն հնարավորություն ունի սովորելու Գերմանիայի օրինակից»,- գրել է հեղինակը՝ նշելով, որ Թուրքիան կարող է նույնն անել Հայոց ցեղասպանության վերաբերյալ, ինչ Գերմանիան արել է Հոլոքոստի հետ կապված:
Խմբագրին ուղղված մեկ այլ նամակում Էրքին Բեյքերը գրում է, որ գերմանացիներն ընդունել են իրենց իսկ պատմության մեջ կատարված ցեղասպանությունը, որովհետև նրանք ստիպված էին: Եղել է Նյուրնբերգյան դատավարությունը, որն ապացուցել է, որ իսկապես ցեղասպանություն է տեղի ունեցել:
«Թուրքիայի համար նման հնարավորություն չի եղել»,- գրում է հեղինակը և նշում, որ ճիշտ կլինի, եթե հայերը և նրանց բարեկամները ցեղասպանության գործով դիմեն Արդարադատության միջազգային դատարան:
Միքայել Հաջիարգյուրուն խմբագրին ուղղված նամակում գրում է, որ աջակցում է թերթի խմբագրականին, որը պաշտպանում է Գերմանիայի խորհրդարանի որոշումը։
«Եվ եթե Ռեջեփ Թայիփ Էրդողանը՝ Թուրքիայի ավելի ու ավելի բռնապետ դարձող նախագահը կարծում է, որ նա կարող է սպառնալ և վախեցնել Գերմանիային՝ «երկկողմ դիվանագիտական, տնտեսական, առևտրային, քաղաքական և ռազմական կապերը» վնասելով, եկեք հիշեցնենք նրան, որ Թուրքիային ավելի շատ է պետք Գերմանիան, քան Գերմանիային Թուրքիան»,- գրել է նա:
Հիշեցնենք, որ The New York Times թերթը գրել էր. «Թուրքիան հերթական անգամ ջղաձգության մեջ է ընկել, ինչը դարձել է գրեթե ամենամյա վարժանք՝ իր մութ անցյալի մասին ճշմարտությունը լսելու պատճառով: Այս անգամ երկիրը հետ է կանչել Բեռլինում իր դեսպանին և սպառնացել է, որ հինգշաթի օրը Գերմանիայի խորհրդարանի կողմից ճնշող մեծամասնությամբ ընդունված Հայոց ցեղասպանությունը ճանաչող բանաձևը ծանր հետևանքներ կունենա»։
«Գերմանացիները, ովքեր հիանալի կերպով առերեսվել են իրենց իսկ պատմության սարսափելի ցեղասպանությանը, ճիշտ քայլ արեցին՝ չենթարկվելով Էրդողանի սպառնալիքներին»,- գրել էր թերթը։