Գերմանիայի թուրքական կազմակերպություններին մեղադրել են Էրդողանի ազդեցության տակ ընկնելու համար. Deutsce Welle
Գերմանիայի խորհրդարանի՝ թուրքական արմատներով պատգամավորները քննադատել են երկրում գործող թուրքական կազմակերպություններին Թուրքիայի նախագահ Ռեջեփ Թայիփ Էրդողանին հարթակ տրամադրելու համար: Շատերին աջակցում է Թուրքիայի իշխանությունը, և դրանք չեն գործում անկախ, գրում է Deutsce Welle-ն:
Թուրք-գերմանական հարաբերությունները դեռ այսքան լարված չեն եղել, որքան նախորդ շաբաթ, գրում է թերթը: Փախստականների հարցով Թուրքիա-ԵՄ համաձայնության պատճառով Անգելա Մերկելը ստիպված է պաշտպանվել Էրդողանի իշխանության ստրուկ լինելու մեղադրանքներից: Այդ տպավորությունն է՛լ ավելի է վատթարացել հունիս 2-ին, երբ կանցլերը չի եկել Բունդեսթագ՝ Հայոց ցեղասպանության մասին բանաձևի քվեարկությանը մասնակցելու:
Բանաձևը տգեղ հետևանքներ է ունեցել, հատկապես Բունդեսթագի թուրքական արմատներով 11 ներկայացուցիչների համար, ովքեր ատելությամբ լի բազմաթիվ էլեկտրոնային նամակներ և մահվան սպառնալիքներ են ստացել: Խորհրդարանականների նկատմամբ ոստիկանական հսկողություն է սահմանվել, իսկ Արտգործնախարարությունը խորհուրդ է տվել նրանց չգնալ Թուրքիա: Տեղեկությունների համաձայն՝ նրանցից մի քանիսը չեղյալ են հայտարարել աշխատանքային այցերը և երկրում նախատեսած արձակուրդները:
Կանաչների կուսակցության առաջնորդ Ջեմ Օզդեմիրը, ով հայկական բանաձևի նախաձեռնողներից մեկն է, թվիթներ է ստացել, որտեղ կոչ է արվում Գերմանիայի թուրքերին կրակել նրա գլխին: Նա ասել է Der Spiegel-ին, որ «մահվան սպառնալիքների թիվը և լեզվի կոպտությունը նոր մասշտաբների է հասել»:
Թերթը հիշեցնում է, որ քվեարկությունից հետո Էրդողանն իր ելույթներում Օզդեմիրին «անողնաշար» է անվանել՝ «Գերմանիայում իր սեփական երկրին ցեղասպանության մեջ մեղադրելու» համար, իսկ այնուհետև հայտարարել է, որ այդ պատգամավորները պետք է արյան թեստ հանձնեն՝ իրենց թուրք լինելը պարզելու համար:
Խորհրդարանականները նշում են, որ Էրդողանի ազդեցությունը շատ ավելին է, քան Անկարայում իր արած ելույթները. Գերմանիայում գործող մի շարք թուրքական կազմակերպություններ Թուրքիայի պետական աջակցությունն են ստանում և որպես այդպիսին գործում են որպես Էրդողանի «Արդարություն և զարգացում» կուսակցության արտաքին ձեռք:
«Գերմանիայում մզկիթների միությունների նկատմամբ Էրդողանի ունեցած հսկողությունը բերում է նրան, որ նա օգտագործում է այս միությունները որպես իր բռնապետական քաղաքականության համար խոսափող»,- DW-ին ասել է խորհրդարանական Սևիմ Դագդելենը:
«Այս միություններն օգտագործվում են Էրդողանի կողմից իսլամիզմի շատ վտանգավոր տեսակ հաստատելու համար, որը հակասում է հիմնարար իրավունքներին: Միլիոնավոր մարդիկ այստեղ՝ Գերմանիայում, ենթարկվում են Էրդողանի հակամարդկային քարոզչությանը, և Գերմանիայի իշխանությունն ուշադրություն չի դարձնում դրան»,- ասել է նա։
Որոշ պատգամավորներ, այդ թվում՝ Օզդեմիրը և Գերմանիայի կառավարության ինտեգրման հարցերով հանձնակատար Այդան Օզագյուզը կոչ են արել Գերմանիայում գործող թուրք-գերմանական ասոցիացիաներին դատապարտել իրենց դեմ սպառնալիքները:
«Դուք պարտավոր չեք հավանել բանաձևը: Բայց թուրքական կազմակերպությունները պետք է դատապարտեն մահվան սպառնալիքները: Չի կարող դրա վերաբերյալ լինել երկու կարծիք»,- ասել է նա:
Դրանից հետո թուրք-գերմանական մի քանի կազմակերպություն իսկապես դատապարտել է պատգամավորների դեմ սպառնալիքները՝ առաջին հերթին, սակայն, քննադատելով պատգամավորներին բանաձևին կողմ քվեարկելու համար: