Պետությունն ամեն ինչ անում է, որ հարկատուների թիվը տարեց տարի պակասի. Նիկոլ Փաշինյան
Ազգային ժողովում Հարկային օրենսգրքի շուրջ քննարկման ժամանակ ՀԱԿ խմբակցության պատգամավոր Նիկոլ Փաշինյանը ներկայացրեց որոշ պաշտոնական թվեր, ըստ որոնց՝ ՀՀ-ում կա 615 հազար վարձու աշխատող, և նրանցից 204 հազարը պետական բյուջետային աշխատողներ են, որոնք, ըստ էության, հարկատուներ չեն: «Ստացվում է, որ 361 հազար ակտիվ հարկատու կա գումարած 50-54 հազար անհատ ձեռներեցներ: Մեր բյուջե այս մարդկանցից է հարկ գնում, և հիմա փոխանակ պետությունն ամեն ինչ անի՝ նրանց թիվն ավելացնելու համար, ըստ էության, անում է, այն, որ նրանց թիվը տարեց տարի պակասում է, իսկ հարկային բեռն ավելանում է»,-ասաց նա:
Պատգամավորը նկատեց, որ հարկ վճարող 361 հազար մարդկանց վրա արդեն իսկ կա 525 հազար թոշակառուների թոշակի վճարման բեռը, իսկ 2018 թվականից էլ ավելանուն է 5 տոկոս պարտադիր կուտակային վճարը: Ըստ նրա՝ այս անձանց մինչև վերջ պետությունը քամում է, ինչը խթանելու է արտագաղթը և գործազրկության աճը:
Նիկոլ Փաշինյանը նշեց, որ թեև հարկերը փոքր-ինչ նվազում են, միևնույն է, դրա փոխարեն ստանում են ակցիզային հարկի փաթեթը: «Դրա արդյունքում թանկանում է ծխախոտը և օղին: Կառավարությունն ասում է՝ հա, մենք օղու վաճառքը չեն խրախուսում: Այսինքն՝ էս մարդիկ Նոր տարի չե՞ն անելու, ծնունդ չե՞ն անելու և իրենց հյուրի դիմաց մի շիշ արաղ չե՞ն դնելու, ի՞նչ է` պետությունով ընկել եք էս մի շիշ օղու հետևից»,-ասաց նա և նշեց, որ հաջորդը թանկանում է դիզվառելիքը, բենզինը, լիցքավորման գազը:
«Իսկ ԱԺ փոխնախագահը (Հերմինե Նաղդալյան- Tert.am) սենսացիոն եզրահանգում է անում և ասում է՝ խմեք թրմօղի և քշեք հեծանիվ, բեռներն էլ էշով կտեղափոխենք չէ՞, վարուցանք էլ գութանով անենք չէ՞, միջքաղաքային տրանսպորտն էլ ֆայտոնով ենք անելու, Երևան-Ռոստով ամենօրյա լյուքս դասի ֆայտոն է լինելու: Թարմ օղին ու գինին մեկ ու կես անգամ ավելի թանկ է, նույն է, որ մարդկանց ասեք՝ ձուկը թանկացել է սև իկրա կերեք»,- ասաց Նիկոլ Փաշինյանը:
Ինչ վերաբերում է կոռուպցիայի և ստվերի դեմ պայքարին՝ պատգամավորն ասաց, որ իշխանությանը մոտիկ կանգնած գազալցակայաններում երկու խողովակ կա: «Մեկի վրա հաշվիչ կա, մյուսի վրա չկա, Կառավարության հետ պայմանավորվում են՝ էդ տարի հաշվիչով խողովակը ոնց բացեն, հետո ոնց փակեն, փոխանակ գնան էս խողովակի հետևից, ընկել են սպառողների բեռն են ավելացնում... Էն որ չենք հասկանում՝ ո՞նց եղավ, որ էս օլիգարխները 1-2 տարվա ընթացքում իրենց հարստությունը կուտակեցին, այ սենց եղավ, ՌԴ-ից գույքի դիմաց 140, 200, 300 միլիոնի դիմաց գազ բերեցին, էդ գազալցակայանի առանց հաշվիչ խողովակների, կներք արտահայտությանս, «կաչայտ» արեցին ու դարձան խոշոր բարերարներ, ազգի փրկիչներ»,-նշեց պատգամավորը:
Նա նաև հավելեց, որ նման Հարկային օրենսգիրք ավելացնելու է հարկահավաքություն, քանի որ իշխանությունը հստակ տեսնում է արտաքին պարտք չսպասարկելու վտանգը: