Ունենք ներքին համոզմունք, որ ադրբեջանական ագրեսիայի մասին վկայող տեսանյութն իրական է. Անդրիաս Ղուկասյան (տեսանյութ)
2016-ի ապրիլի 2-ին ադրբեջանական ագրեսիայի մասին վկայող համացանցում հայտնված տեսանյութը, որը երեկ ուղարկվեց ՄԱԿ-ի գլխավոր քարտուղարին։ Եթե իրական չլիներ, չէր հանձնվի Հայաստանում ՄԱԿ-ի գրասենյակ` հետաքննության նպատակով:
Հիշեցնենք, որ երեկ «Նոր Հայաստան» քաղաքացիական նախաձեռնությունը բաց նամակ էր հղել Միավորված ազգերի կազմակերպության Գլխավոր քարտուղար՝ Բան Կի Մունին՝ կից ներկայացնելով ապրիլի 2-ից հետո ադրբեջանական կողմի հարձակման առաջին րոպեները պատկերող տեսանյութը` որպես ադրբեջանական ագրեսիայի խոսուն ապացույց:
Tert.am-ի հետ զրույցում նախաձեռնության անդամ Անդրիաս Ղուկասյանը, որը երեկ ՄԱԿ-ի գրասենյակին էր հանձնել համապատասխան նամակը ու նշված տեսանյութը, դրա իսկության վերաբերյալ հարցին ի պատասխան ասաց. «Մենք ունենք ներքին համոզմունք, որ տեսանյութը իրական է, համապատասխանում է իրականությանը»:
Հարցին, թե այն կորցրա՞ծ, հետ վերցրա՞ծ դիրք է, ասաց. «Այն չի էլ հանձնվել, որ հետ վերցվեր: Եվ կարծում եմ, այդ նկարահանումն արվել է մեր կորցրած դիրքերից ոչ շատ հեռու»:
Հիշեցնենք, որ երեկ ՄԱԿ-ի գլխավոր քարտուղարին ուղղված նամակում ասվում էր.«Դուք, անշուշտ, տեղյակ եք, որ ս․թ․ ապրիլի 2-ին Լեռնային Ղարաբաղի հակամարտության շփման գծում տեղի է ունեցել ռազմական բախում, որի արդյունքում զոհվել և վիրավորվել են մի քանի հարյուր զինվորներ, եղել են զոհեր նաև խաղաղ բնակչության շրջանում, հազարավոր մարդիկ ստիպված են եղել ժամանակավոր լքել իրենց տները, շատերն էլ առ այսօր չեն կարող հետ վերադառնալ իրենց բնականոն կյանքին, քանի որ հակամարտող կողմերի միջև տեղի է ունեցել շփման գծի էական խախտում»,-գրված էր Բան Կի Մունին ուղղված նամակում: Նամակն ավարտվում էր խնդրանքով` նախաձեռնել միջազգային հետաքննություն՝ ապրիլի 2-ին տեղի ունեցած հրադադարի ռեժիմի խախտման համար պատասխանատու կողմին բացահայտելու նպատակով։
02. 04 .2016 ամսաթվով 11 րոպեանոց տեսանյութում պարզորոշ երևում է շփման գծում ադրբեջանցիների հարձակվողական առաջխաղացումը, երբ մեր հայ զինվորները խոսում են միմյանց հետ: «Հեսա, ստեղ են»,-ասում է դիրքապահը, մյուսը պատասխանում է` «Գալիս են, ասա` թող կրակեն»: Ապա մեկ այլ զինվոր հաղորդում է.« Մի 100 հոգի կլինեն, մենակ էս փոքր հատվածի վրա մի 60 հոգի հաշվել եմ»: Սենոր Հասրաթյանը Tert.am-ի հարցին,թ ե այս տեսանյութից երևո՞ւմ է, որ նախահարձակ կողմն Ադրբեջանն է, ասաց.«Ես գիտեմ, որ ապրիլի 1-ի լույս 2-ի գիշերը լայնածավալ հարձակման կողմը եղել է Ադրբեջանը և դա միանշանակ հաստատում եմ, որ այդ հարձակման ժամանակ հայ զինվորներն իրենց դիրքերը պաշտպանել են փայլուն` շարքային զինվորից մինչև հրամանատար»:
ԼՂ ՊԲ մամուլի քարտուղար Սենոր Հասրաթյանն էլ Tert.am-ի հետ զրույցում հայտնելով, որ տեսանյութը ԼՂ ՊԲ տեղեկատվության և հասարակայնության կողմից չի տեղադրվել, ավելացրեց, որ որևէ կերպ չի մեկնաբանելու տեսանյութը։ «Ուստի, հարցրեցեք նրանց, ովքեր տեղադրել են»,-լակոնիկ ավելացրեց Սենոր Հասրաթյանը: