Ինչպես են քվեարկելու խմբակցություններն առաջին ընթերցմամբ Հարկային օրենսգրքին
Այսօր Ազգային ժողովում Հարկային օրենսգրքի վերաբերյալ խմբակցությունները հայտարարեցին, թե ինչպիսի դիրքորոշում ունեն և թե ինչպես են քվեարկելու: ՕԵԿ խմբակցության ղեկավար Հեղինե Բիշարյանը կարևոր համարեց, որ Հարկային օրենսգիրքը տա պատասխան, թե որքանով է այն կանխատեսելի, այդ թվում՝ ներդրողների համար: «Կիսատ-պռատ մոտեցումներով ոչ մի տեղ չենք գնա: Պետք է հետ կանչել այս օրենսգիրքը և նոր օրենսգիրք մշակել»,-ասաց նա և նշեց, որ իրենց քաղաքական ուժը դեմ է այս նախագծին:
ՀԱԿ խմբակցության ղեկավար Լևոն Զուրաբյանը կարծում է, որ այս դեպքում Համաշխարհային բանկը դարձել է թելադրող, իսկ Կառավարությունը կուրորեն կատարում է նրա պահանջները, ինչն անընդունելի է և խայտառակություն է: «Գանձարանը դատարկ է և կառավարությունը հուսահատ քայլեր է կատարում, որ գանձարանը կարողանա լցնել»,-ասաց և նկատեց, որ այս հարցի շուրջ աշխուժություն դրսևորեցին նաև «պասիվ» հանրապետականները: «Ստվերն ավելանում է, որովհետև օլիգարխներին ձեռք չենք տալիս: Մեր գլխավոր նպատակը գիշատիչ պետությունից վերածվել զարգացողական պետության»,-ասաց նա և նշեց, որ արմատական փոփոխություններ են պետք:
ԲՀԿ խմբակցության պատգամավոր Միքայել Մելքումյանը նշեց, որ Հայաստանի հարկային օրենսգիրք պետք է, սակայն այն կարող է արդյունք տալ, եթե մյուս խնդիրների հետ միասին քաղաքական լուծումներ են առաջարկվում: Նա խնդրեց արձագանքել հիմնական զեկուցող ՊԵԿ փոխնախագահ՝ Վախթանգ Միրումյանին՝ իրենց հարցադրումներն: «ԲՀԿ-ի քվեարկությունը կախված կլինի ձեր դիրքորոշումը մեր հարցերի նկատմամբ ինչպիսին է: Մենք պատրաստ ենք աշխատել, եթե դա արդար է և բխում է շահերից»,-ասաց նա և նշեց, որ վաղը դիրքորոշումը վարման կարգով կասենք։
«Հանրապետական» խմբակցության ղեկավար Վահրամ Բաղդասարյանն ասաց, որ Հարկային օրենսգիրքը պետք է լինի անխոցելի, առնվազն երեք տարի փոփոխություն չառաջացնի և որպեսզի տնտեսվարող սուբյեկտը հարկայինին որպես սարսափ չընկալեն: Նա նշեց, որ անհանգստությունները պետք է բարձրացվեն և առաջարկությունները քննարկվեն՝ մինչև երկրորդ ընթերցում:
«Հորդորում եմ հիմնական զեկուցողին այստեղ առանց միմիկան շարժելու և նույն տոնայնությամբ նույն պատասխանները չհնչեցվեին, տրվեն հստակ պատասխաններ, ի վերջո ըստ ոլորտների՝ բեռն ավելանո՞ւմ է, թե՞ ոչ»,-ասաց նա և նշեց, որ կառավարության հետ պայմանավորվածություն ունեն, որ առաջի ընթերցմամբ ընդունելու են, իսկ աշունն անցնում են քննարկում՝ բոլոր առաջարկությունների համար ստանալով պատասխաններ: Չնայած դրան նա նշեց, որ առաջարկվող նախագիծը մի շարք խնդիրներ է լուծում: