Ադրբեջանի ռազմական հանցագործությունները դատապարտելիս ԼՂ-ի չճանաչված լինելը ՄԱԿ-ի, ՄԻԵԴ-ի որոշումների վրա ազդեցություն չի ունենա. Հ. Նաղդալյան
ՀՀ Ազգային ժողովի փոխնախագահ Հերմինե Նաղդալյանը Tert.am-ի հետ զրույցում անդրադարձավ ապրիլյան պատերազմի ընթացքում Ադրբեջանի կողմից իրականացրած ռազմական հանցագործությունների, մարդու իրավունքների խախտումների հարցով միջազգային կառույցներին դիմելուն և ստացված արձագանքներին:
Նա ասաց, որ այդ գործընթացների արդյունքները մեկ օրում կամ մեկ ամսում չեն լինում: «Մարդու իրավունքների հանձնակատարի հետ գործընթացներ նախաձեռնվեցին և նյութեր, փաստեր, փաստաթղթեր, լուսանկարներ ուղարկվեցին: Այսինքն` ամբողջ նյութերը, ապացույցները, որոնք մենք ունենք, ներկայացված է՝ ինչպես նրան, այնպես էլ այդպիսի աշխատանք կատարված է և կատարվում է միջազգային այլ հարթակներում՝ ԵԱՀԿ, ՄԱԿ, Մարդու իրավունքների պատասխանատուներ: Մեր զոհված զինվորների ծնողների, հարազատների կողմից դիմումներ են եղել նաև Մարդու իրավունքների եվրոպական դատարան, և դրանք ևս ընդունվել են վարույթ: Իրապես, սրանք գործընթացներ են, որ ժամանակ են պահանջում, օրինակ՝ Մարդու իրավունքների եվրոպական դատարանում այդ գործընթացները տարիներ են տևում»,- ասաց նա:
Հարցին, թե կաշկանդվածություն տեսնում եք այդ կառույցների կողմից՝ Ադրբեջանի դեմ որոշումներ կայացնելու կամ չճանաչված պետության շրջանակներում գործողություններ իրականացնելու հարցում, ասաց, որ այդ առումով Մարդու իրավունքների հանձնակատարի հետ երկար զրույց է ունեցել: «Մեր շեշտադրումը եղել է հետևյալը, որ մենք բարձրացնում ենք հարցեր, որոնք մարդու իրավունքների շրջանակներում են, որոնք հաստատված են կոնվենցիաներով, եվրոպական իրավական նորմերով, միջազգային նորմերով, և այդ հարցերի մեջ պետք է ճանաչված-չճանաչվածություն հանգամանքը ազդեցություն չունենա»,- ասաց նա և մեջբերեց Եվրոպայի խորհրդի գլխավոր քարտուղարի այն միտքը, ըստ որի՝ մարդու իրավունքների տեսակետից փակ տարածքներ կամ սև տարածքներ չպետք է լինեն:
«Մարդու իրավունքների հանձնակատարի դիրքորոշումը ևս այնպիսին է, որ պետք է կարողանալ այս եղած շրջանակների մեջ գտնել ճանապարհ, հնարավորություններ՝ անդրադառնալու այս խնդիրներին»,- ասաց նա:
Հերմինե Նաղդալյանը նշեց նաև, որ հաճախ Ադրբեջանի կողմից արվում են ամեն տեսակի տրամաբանություն չունեցող քայլեր՝ իրենց ուզածին հասնելու համար, որոնք սակայն մեծ մասամբ չեն անցնում: «Ես կարծում եմ, որ կարևորագույն պահերին, երբ մենք դիմել ենք եվրոպացիների սթափ դատողությանը, ճշմարիտ եվրոպական սկզբունքներին հավատարիմ նվիրվածությանը, այնուամենայնիվ նպատակին հասել ենք, դա իրագործվել է»,- ասաց նա:
Նա նշեց, որ թեև Ադրբեջանի կողմից շատ միջոցներ, գործիքներ օգտագործվում են, սակայն ըստ նրա՝ դրանք բոլորը մեծ հաջողություններ չեն բերում: «Համենայնդեպս, համարժեք արդյունքը, այն ռեսուրսի հետ համեմատ, որ դրվում է, շատ փոքր է»,- հավելեց նա: