Եթե մի խեղճուկրակ գործարար մի երկու կոպեկ չմուծեր, «գնդակահարելու» էին, հիմա «Հրազդանի ցեմենտի» տույժերն են ներում. Ա.Մարտիրոսյան
«Ժառանգություն» կուսակցության նախագահ Արմեն Մարտիրոսյանը գնահատելով, որ ապրիլյան քառօրյայից հետո էլ կարող է ԱԺ-ում հայտնվել «Հրազդան-ցեմենտ» գործարանի պարտքերից առաջացած տույժերը ներելու մասին օրինագիծ, Tert.am-ի հետ զրույցում եզրակացրեց` երկրում ոչ մի բան չի փոխվել:
«Ես զարմանում եմ զարմացողների վրա, որոնք կարծում են, թե իշխանության մոտ ինչ-որ մի բան պետք է փոխվել»,-ասաց Արմեն Մարտիրոսյանը ու հավելեց. «Հլը թող ինչ-որ փոքր ու միջին բիզնեսմեն մի շաբաթ հարկն ուշացնի, հլը տեսեք` ոնց են իրենց առաջին պատահած պատի տակ դնում ու «գնդակահարում»»:
Նշենք, որ այսօր մեկնարկած ԱԺ արտահերթ նիստի օրակարգում է նախկինում հայ գործարար Միխայիլ Բաղդասարովին պատկանող («Հրազդան-ցեմենտ»-ի գույքը վարկային պարտավորությունների դիմաց գրավադրված է «ՎՏԲ-Հայաստան» բանկում Tert.am) «Հրազդան-ցեմենտ»-ի 2016թ. փետրվարի 1-ի դրությամբ 933.3 մլն դրամ պարտքերից առաջացած տույժերից ազատելու հարցը` հիմնավորմամբ, որ «համաշխարհային ֆինանսատնտեսական ճգնաժամի տարիներին հանրապետությունում շինարարության տեմպերի կտրուկ անկման հետևանքով Ընկերության աշխատանքն ընթացել է անկայուն ռիթմով, հաճախակի ընդհատումներով, ինչը բացասական ազդեցություն է ունեցել ընկերության ֆինանսատնտեսական գործունեության վրա` արդյունքում առաջացնելով ֆինանսական պարտավորություններ:
Հիշեցնենք, որ ապրիլի 26-ին ԱԺ քվեարկության արդյունքում տապալվեց «Հրազդանի ցեմենտի գործարանի հարկային պարտավորությունների տույժերի դուրսգրման մասին» օրինագիծը` քվորումի չապահովվման պատճառով:
Իսկ նախքան այդ վերցվեց 20 րոպեանոց ընդմիջում և հնչեց կոչ, որ «պեղեն» Բաղդասարովին ,թող գա, պատասխանատվություն կրի: Իսկ պատգամավոր Ուրիխանյանն էլ նկատեց, որ ապրիլյան քառօրյա պատերազմից հետո տպավորություն ուներ, որ պայմանավորվել են , եթե ոչ գողացողի ձեռքը կտրել, ապա նրան բռնել ու դատել:
Ամեն դեպքում կառավարության նախորդ նիստին ՀՀ էկոնոմիկայի նախարար Արծվիկ Մինասյանը հայտարարեց, որ օրինագիծը տեխնիկական պատճառներով չի ընդունվել:
Ավելին, ըստ Արմեն Մարտիրոսյանի, եթե այդ մտածողությունը լիներ, քառօրյա պատերազմում բանը չէր հասնի այդ քանակի զոհերի. «Ադրբեջանը 2011 -20012 թթ. անընդհատ զինվում էր և 5 մլրդ. դոլարի զենք էր գնում, ակնհայտ էր, որ այդ զենքը չէր կարող ուղղվել ո՛չ Իրանի դեմ, ո՛չ Վրաստանի, ո՛չ ՌԴ-ի: Եվ ակնհայտ էր, որ այդ զենքը նախատեսված էր միակ հարևանի դեմ, ում հետ իշխանությունը խնդիր ուներ, և եթե իշխանությունը ուներ կառավարման նորմալ տրամաբանություն, եթե պետական միջոցների ու կոռուպցիայի վրա չնստեին, իրենք այդ զենքերը վաղուց կգնեին, և մենք չէին ունենա ապրիլյան պատերազմին այդ 100 զոհը: Եվ չմոռանանք, որ այդ պարտքերը Բաղդասարովը պարտք է ոչ թե ինչ-որ օլիգարխի, այլ պետությանը և պատահական չէ, որ «Արմավիան» սնանկացավ, և այն բազմամիլիոն գումարները, որոնք օդի հարկի տեսքով գնում էր բյուջե, դա էլ տվեցին «Արմավիային»»:
Ըստ Արմեն Մարտիրոսյանի` ինչ տարբերություն թե՛ այս օրինագիծը, թե՛ Ընտրական օրենսգիրքը, որը նույնպես ԱԺ-ում է առաջին ընթերցմամբ քվեարկելու համար, թե՛ քաղբանտարկյալներին ազատ չարձակելը:
«Եթե քաղբանտարկյալներին մինչև հիմա չեն ազատել, ինչի՞մասին է խոսքը. նշանակում է` իրենց տրամաբանությունը ոնց եղել է, այնպես էլ մնացել է: Եթե դեռ բանտում են Շանթը, Վոլոդյա Ավետիսյանը»,-ասաց Արմեն Մարտիրոսյանը: