Ադրբեջանի քաղաքական էլիտան ՄԽ մասին խոսում է այնպես, ինչպես Երևանի կրկեսի դիմաց կանգնողների մասին են խոսում. Նաիրա Զոհրաբյան
Ադրբեջանը դիմել է ՄԱԿ-ի անվտանգության խորհրդի նիստին ԼՂ հակամարտության 1994թ.-ի Զինադադարի մասին պայմանագիրը չեղարկելու համար, որովհետև հարցը ռազմական ճանապարհով լուծելու նպատակ ունի: Tert.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը:
«Տևական ժամանակ է ակնհայտ էր, որ Ադրբեջանը գնում է ԼՂ խնդիրը ռազմական ճանապարհով լուծելու մարտավարությամբ: Սա պարզ էր հատկապես վերջին մեկ-երկու տարիներին Ադրբեջանի ռազմական բյուջեն ուժգնացնելու պատճառով: Պարզ էր Ադրբեջանի իշխանությունների ռազմատենչ հայտարարություններից: Ադրբեջանը հրաժարվում է իր կողմից ստորագրած միջազգային պարտավորություններից, չթույլատրվող սպառազինություն չօգտագործելու ստանձնած պարտավորություններից, 1949թ.-ի ժնևյան կոնվենցիայից՝ խոշտանգելով հայ զինվորներին, քաղաքացիական բնակիչներին»,- մասնավորեցրեց Նաիրա Զոհրաբյանը:
Ըստ նրա՝ Ադրբեջանի նպատակը խաղաղ բանակցային գործընթացը տապալելն է, ԼՂ հարցը ռազմական ճանապարհով լուծելը:
«Հատկապես վերջին շրջանում Ադրբեջանում արմենաֆոբիայի՝ աղանդավորության աստիճանի հասնող հիստերիկ բռնկումներ են նկատվում, որի վկայությունը ադրբեջանական դպրոցներից մեկում առաջին դասարանում կազմակերպված արմենաֆոբիայի դասընթացն էր, որի ժամանակ ուսուցիչը դրդում էր վեց-յոթ տարեկան երեխաներին վայրագ հայտարարություններ անել հայերի մասին: Այնպես որ ՄԱԿ-ին ուղված հայտարարությունը ամբողջ գործընթացի շարունակական տրամադրությունն է, որովհետև իրենց պետք չէ խաղաղություն, պետք է պատերազմ»,- շեշտեց պատգամավորը:
Նաիրա Զոհրաբյանի խոսքով՝ Ադրբեջանին պետք չէ նաև ԵԱՀԿ Մինսկի խումբը, ուստի պատական չէ, որ Ադրբեջանի քաղաքական էլիտան ՄԽ մասին խոսում է այնպես, ինչպես «Երևանի կրկեսի դիմաց կանգնողների մասին են խոսում»:
«Մեր բոլոր վերապահումներով առ Մինսկի խումբը, որ հասցեական հայտարարություններ չեն հնչեցնում, մենք հասկանում ենք, որ ՄԽ-ին, բանակցություններին ալտերնատիվ չկա»,- նշեց նա:
Հարցին՝ ինչո՞ւ է ՀՀ ԱԳՆ-ն ՄԱԿ-ին դիմելու ադրբեջանական քայլին արձագանքում միայն տասն օր անց, Նաիրա Զոհրաբյանը հիշեցրեց, որ ոչ միայն այս, այլև մի շարք այլ հարցեր պետք է ստանան պատասխաններ անձամբ պատասխանատուների կողմից, ոչ թե նրանց կողմից գործուղված տեղակալների մասին:
«Ես ցանկանում եմ պարզ հարցի պատասխան ստանալ, օրինակ, Հայաստանի սպայակազմը, գեներալիտետը, պապական միլիարդատերե՞ր են եղել, Ռոքֆելլերի կորած որդինե՞րն են եղել, հակառակ դեպքում ինչպե՞ս են այդ շքեղ մեքենաներով շրջում, որոնց կնախանձեն Դուբայի շեյխերը: Կամ Պրահայում միլիարդավոր դոլարներով կառուցված հյուրանոցի մասին եմ ուզում հարցնել՝ պաշտպանության ոլորտից ո՞ւմ է պատկանում այդ հյուրանոցը, գուցե հերյուրանքնե՞ր են քաղաքական էլիտայում շրջանառվող լուրերը: Կամ ո՞ւմ է պատկանում Վահագնի թաղամասում կառուցվող առանձնատունը, որը 150 պատուհան ունի: Սրանք հարցեր են, որ ես որպես պատգամավոր պիտի ուղղեմ պատկան ոլորտի ղեկավարներին: Եթե նրանք չեկան, փակ նիստ չհրավիրվեց, ես ուղղելու եմ տվյալ ոլորտի պատասխանատուներին, որովհետև նրանցից որոշների անուններն են շրջանառվում միլիարդավոր ունեցվածքներ ունենալու մեջ»,- ընդգծեց Զոհրաբյանը: