Հզոր քայլ կլինի, երբ Գերմանիան ճանաչի Հայոց ցեղասպանությունը, Թուրքիան էլ մնա միայնակ. Հայկ Դեմոյան
Հայոց ցեղասպանության թանգարան-ինստիտուտի տնօրեն Հայկ Դեմոյանը Tert.am-ի հետ զրույցում անդրադառնալով Հայոց ցեղասպանության միջազգային ճանաչման գործընթացին, կարևորեց հատկապես Գերմանիայի ճանաչումը՝ որպես առանցքային երկիր, որն ունի իր մեղսակցության բաժինը:
«Գտնում ենք, որ գերմանական հիշողությունը պետք է ագուցվի և կապ հաստատի Հայոց ցեղասպանության հիշողության հետ»,- ասաց նա:
Հայկ Դեմոյանը նշեց, որ բոլոր նախանշանները վկայում են այն մասին, որ Գերմանիայի կողմից ճանաչման միտում ոչ միայն կա, այլ նաև բավական լուրջ են խոսակցություններն այդ մասին: Նա հայտնեց, որ ապրիլի 21-ին հյուրընկալել են Գերմանիայի Բունդեսթագի ներկայացուցչին, որը հենց զբաղվում է այդ հարցով:
«Եթե այս ամենը ավարտվի ինչ-որ հերթական լեզվամարզանքով, ինչպես մենք ենք ասում, ձևակերպումներ հղկումներով, կամ զգուշավորությամբ, ապա դա, իհարկե, շատ վատ ազդեցություն կունենա ժամանակակից գերմանական քաղաքական մշակույթի վրա»,-ասաց նա:
Չնայած դրան՝ նա նշեց, որ պետք է հասկանալ, որ Թուրքիայի և Գերմանիայի միջև թե՛ ներկա, թե՛ պատմական, կապը շատ հզոր է, առավելևս հաշվի առնելով թուրքական մեծ համայնքի ներկայությունը Գերմանիայում:
«Դա իսկապես մեծ ու հզոր քայլ կլինի, երբ Գերմանիայի Բունդեսթագը պաշտոնապես ճանաչի և դատապարտի Հայոց ցեղասպանությունը: Այս առումով Թուրքիան մնում է մենակ, որովհետև Ավստրիան՝ իր գլխավոր դաշնակիցներից մեկը ճանաչել է, Գերմանիայի պարագայում դա հուժկու հարված կլինի նաև հոգեբանական առումով Թուրքիայի ներկա քաղաքական վարչակազմին: Մեզ համար կարևոր է, որպեսզի Գերմանիան որպես համաշախարհային տարիներին Թուրքիայի գլխավոր դաշնակից և Ցեղասպանության մեջ մեղսակցություն ունեցող երկիր առերեսվի սեփական հիշողության հետ»,-ասաց նա:
Ինչ վերաբերում է նրան, թե Ցեղասպանության 100-րդ տարելիցից հետո կա՞ մտահոգություն, որ կդանդաղի Ցեղասպանության միջազգային ճանաչման գործընթացը, Հայկ Դեմոյանն ասաց, որ, իհարկե, 100-րդ տարելիցը բացառիկ էր իր հնչեղությամբ, միջոցառումների ծավալով, աշխարհագրությամբ, ինչը բերեց իր արդյունքը, սակայն այդ պրոցեսը չավարտվեց միայն 100-րդ տարելիցով, քանի ճանաչման գործընթացը շարունակություն ունի:
Հայկ Դեմոյանը նշեց, որ որոշ ժամանակ, կարող է այդ գործընթացում դադար լինել, սակայն դա չպետք է մեզ շփոթեցնի: «Ի վերջո, այս գործընթացում շատ կարևոր է նաև միջազգային օրակարգը»,-ասաց նա:
Իսկ ինչ վերաբերում է ԱՄՆ նախագահ Բարաք Օբամայի ելույթին, ապա Հայոց ցեղասպանության թանգարան-ինստիտուտի տնօրենն ասաց, որ Օբամայի հետ հույս չի էլ կարող կապել և թեև շատ բան կփոխվի իր կողմից Ցեղասպանություն բառն արտահաբերելուց հետո: «Սակայն ես չեմ ցանկանում, որ բոլորս ամեն ապրիլի 24-ից առաջ հույսեր կապենք՝ կասի, թե չի ասի, այդ փուլը մենք վաղուց պետք է վերապրած լինենք»,-ասաց նա:
Անդրադառնալով այն մտահոգությանը, թե Ադրբեջանը ապրիլին ավելի ինտեսիվ է խախտում հրադադարի ռեժիմը՝ փորձելով շեղել միջազգային հանրության ուշադրությունը Ցեղասպանության խնդրից, Հայկ Դեմոյանն ասաց, որ այդպիսի տեսակետ իրավունք ունի գոյություն ունենալ:
«Իմ կարծիքն այն է, որ ռազմական գործողություններ առնվազն մեկ շաբաթ պետք է տևեր, բայց դա ավելի շուտ ավարտվեց հենց մեր զինվորների խիզախության շնորհիվ»,-ասաց նա՝ անդրադառնալով ապրիլի 1-ից Ադրբեջանի նախահարձակ գործություններին:
Ինչ վերաբերում է նրան թե կա՞ անհանգստություն, որ Ադրբեջանը կփորձի ավելի մեծացնել լարվածությունը ապրիլի 24-ին, ապա նա ասաց.«Ելնելով այն տրամաբանությունից, թե ինչպես է գործում ադրբեջանական զինուժը շփման գծում, այդպիսի հավանակնությունը մեծ է»,-ասաց նա: