Էլի ու էլի կժպտամ, եթե իմանամ՝ իմ ժպիտը գեթ մեկ զինվորի կյանք կփրկի․ Արարատ Միրզոյանը՝ Չավուշօղլուի հետ նկարի մասին
Հետահայաց նայելով՝ հիմա կարծում եմ, որ ԱԳ նախարարի մակարդակով Անթալիայի միջազգային ֆորումին մասնակցելը ճիշտ որոշում էր։ Մենք վստահ ենք, որ Հայաստանը և Թուրքիան կարող են և արժե, որ նորմալացնեն, կարգավորեն հարաբերությունները ու բացեն սահմանները։ Այս մասին ԱԺ–ում կառավարության հետ հարցուպատասխանի ժամանակ ասաց ԱԳ նախարար Արարատ Միրզոյանը։
«Այս գործընթացի մեջ երկու նախարարների հանդիպումը ևս իր դրական ազդեցություն ունեցավ։ Կոնկրետ պայմանավորվածություն ձեռք չբերվեց, բայց ինչպես մենք, այնպես էլ թուրքական կողմը վերահաստատեցինք, որ շարունակում ենք երկխոսությունը առանց նախապայմանների՝ նպատակ ունենալով իսկապես բացել սահանները։ Տեմպի առումով երկու կողմերի միջև որոշ տարբերություններ կան, բայց ընդհանուր առմամբ վերբալ մակարդակով հաստատում ենք, որ նպատակը սահմանների բացումն է։ Քննարկել ենք ընթացիկ առևտրային խնդիրներ, որպեսզի դյուրացնենք այդ ոլորտում գործող մեր հայրենակիցների կյանքը»,– ասաց նա։
Անդրադառնալով հանդիպման ընթացքում իր և Չավուշօղլուի նկարին, ինչպես նաև այն փաստին, որ քննարկման առարկա էր այն, որ Չավուշօղլուն Միրզոյանի հետ հանդիպել էր առանց փողկապի, նախարարը նշեց․ «Այդ հարցերը, կարծես, շատ էին քննարկվել, չարչրկված փողկապի թեմայով ասեմ, որ այդ ֆորումը առանց փողկապների ֆորմատ էր, տարբեր լուսանկարներում կարող եք տեսնել, որ մի մասը կրում էին, մի մասը չէին կրում։ Ինձ Չավուշօղլուի հետ կարող էիք տեսնել փողկապով, Ավստրիայի ԱԳ նախարարի հետ հանդիպանը առանց փողկապի։ Ինչ վերաբերում է ժպիտին, ապա, եթե ես իմանամ, որ իմ ժպիտը ապագայում գեթ մեկ հայ զինվորի կյանք փրկել, ապա ես էլի ու էլի կժպտամ»,– ասաց Միրզոյանը։