Իշխանությունը թռիչքներով նահանջում է ժողովրդավարությունից․ ուզում եմ նայել նախկին քաղհասարակությանը և հարցնել` որտե՞ղ է ժողովրդավարությունը, ես էլ եմ ուզում այն տեսնել. Քրիստինե Վարդանյան (տեսանյութ)
ՀՀ ներքաղաքական ամենակարևոր թեման ՏԻՄ ընտրություններն են և տեղի ունեցած ընտրություններից մենք մի քանի արձանագրում պետք է անենք։ Այս մասին ասուլիսի ժամանակ ասաց «Հայաստան» խմբակցության պատգամավոր Քրիստինե Վարդանյանը։
«Առաջին արձանագրումը պետք է ուղղվի նախկին քաղհասարակության ներկայացուցիչներին, որոնք պնդում են, որ անկախ ամեն ինչից՝ Հայաստանը բռնել է ժողովրդավարության ճանապարհը և այդ ճանապարհին ինչ-որ զոհողություններ կարելի է անել։ Ուզում եմ նայել այդ մարդկանց և հարցնել` որտե՞ղ է այդ ժողովրդավարությունը, ես էլ եմ ուզում դա տեսնել։ Ես ուզում եմ նրանց հարցնել՝ ե՞րբ եք տեսել, որ նախկինում ժողովրդի կողմից ընտրված քաղաքապետը մնա կալանքի տակ։ Իշխանությունը շարունակում է թռիչքներով նահանջել ժողովրդավարությունից»,– ասաց նա։
Վարդանյանը նշեց, որ իշխանությունը փորձելու է այս ընտրություններում իր պարտությունը ներկայացնել որպես ժողովրդավարության հաղթանակ։
«Իրենք պարզապես տապալվել են, արել են ամեն ինչ, որ նման արդյունք չունենանք, չեն խորշել կիրառել բոլոր միջոցները, այդ թվում անօրինական, բայց մարդիկ փաստացի արտահայտել են իրենց վերաբերմունքը։ Գորիսում իրենց քվեով մարդիկ պատասխանել են այն մեղադրանքներին, որ ներկայացված էր Առուշ Առուշանյանին»,– նշեց նա։
Ըստ Քրիստինե Վարդանյանի՝ Հայաստանում չկա «Քաղաքացիական պայմանագիր» անունով ուժ։ Հայաստանում կա Նիկոլ Փաշինյան, որը մարդկանց կարողանում է դեռ խաբել, բայց իրենք էլ գիտեն, որ այս խաբելու գործընթացն իրենք անվերջ չեն կարողանալու տանել։
«Փաստացի որտեղ Նիկոլ Փաշինյանն իր դեմքով չի գնում և իր պոպուլիզմով մարդկանց չի խաբում, մենք ունենում ենք այսպիսի տվյալներ։ Շատ կարևոր են նաև Կապան համայնքում կայանալիք ընտրությունները, մարդիկ այնտեղ տեսել են քաղաքապետին, համայնքապետերին և տեսել են, թե նրանք ինչպես են պաշտպանում իրենց համայնքը»,– ասաց նա։
Հարցին` ինչու խորհրդարանական ընդդիմությունը պարբերաբար չի իրականացնում ակցիաներ կալանավորված համայնքապետերի ազատ արձակման պահանջով, Քրիստինե Վարդանյանը պատասխանեց.
«Ցավոք սրտի, բառի բուն իմաստով ունենք աննախադեպ վատ իրականություն ու աննախադեպ անվտանգության ճգնաժամ, որոնք չեն թողնում մեզ կենտրոնանալ որևէ այլ հարցի վրա։ ՀՀ-ում կա մեկ ու շատ կարևոր օրակարգ` անվտանգության և ՀՀ-ի գոյության հարցը։ Այո մենք կարող ենք ամեն օր հավաքվել դատարանների դիմաց և բարձրացնել այս հարցը, բայց կրկնում եմ Հայաստանում կա մեկ, շատ ավելի կարևոր օրակարգ։ Վստահ եմ՝ մեր գործընկերները ևս կասեն, որ իրենց պաշտպանության համար հրապարակային գործողության կարիք չկա»։
Խոսելով խորհրդարանական գործունեության արդյունավետության և փողոցային պայքարին վերադառնալու մասին Վարդանյանը ընդգծեց, որ ինքը չի երազում նստել Խորհրդարանում և լսել, որ ինքը «նախկին կերակրատաշտից օգտվող նախկին» է։
«Հոգեբանական առումով ամենածանրը ԱԺ-ի լիագումար նիստերի օրերն են, որոնք մենք ստիպված ենք հաղթահարել։ Ընդդիմությունը որոշեց գնալ ԱԺ, որովհետև չուներ այնպիսի մի հարթակ, որտեղ ամեն շաբաթ հասարակությանը կարող էր մեսիջ փոխանցել։ Ես նաև վստահ, եմ որ իրատեսական ծրագրի դեպքում հազարավոր մարդիկ կանգնելու են ՀՀ-ի համար»,– ասաց նա։
Քրիստինե Վարդանյանը նաև նշեց, որ ունենք հարյուր հազարավոր քաղաքացիներ, որոնք կողմնորոշված չեն և այդ մարդկանց կողմնորոշվելը կարող է օգնել իրավիճակի հանգուցալուծման, իսկ ԱԺ-ն այդ գործիքներից մեկն է։
«Փողոցային պայքարը ևս այդ գործիքներից մեկն է ու միայն հանրային ճնշումով ենք տեսնում այս իշխանության ավարտը։ Բայց այս ընդդիմությունը չի կարող մարդկանց ուղղակի հանել փողոց, որպեսզի քննադատության չենթարկվի, դրա համար անհրաժեշտ է արդյունավետ և կոնկրետ տեղ տանող ծրագիր»,– հավելեց նա։