«Կարծում էի՝ մեռնելուս ժամը եկել է»․ ԱՄՆ Կոնգրեսի շենքում տեղի ունեցած անկարգություններից տուժած ոստիկանն արտասվել է լսումների ժամանակ
Հունվարի 6-ին ԱՄՆ-ի Կոնգրեսի շենքում երկրի նախկին նախագահ Դոնալդ Թրամփի աջակիցների իրականացրած անկարգությունների ժամանակ տուժած ոստիկանության սպան լսումների ժամանակ հայտնել է, որ վախենում էր դառնալ կատաղած ամբոխի զոհը, հաղորդում է BBC-ն։
«Կարծում էի՝ մեռնելուս ժամը եկել է»,- արցունքն աչքերին ասել է Ակիլինո Գոնելը Կոնգրեսի հատուկ կոմիտեին, որը Կոնգրեսի շենքի վրա հարձակման գործով հետաքննություն է սկսել:
Ոստիկան Գոնելն ամբոխի հետ բախումը նկարագրել է որպես «միջնադարյան ճակատամարտի տեսարան»։
Իրաքյան պատերազմի վետերանը արտասուքն աչքերին նաև քննադատել է հանրապետականներին՝ «հունվարի 6-ի դեպքերի մասին ճշմարտությունը քողարկելու փորձերի» համար։
Նշենք, որ Կոնգրեսի շենքի վրա գրոհից հետո ձերբակալվել է անկարգության առնվազն 535 մասնակից։
Հունվարի 6-ին Թրամփի կողմնակիցները, չընդունելով նոյեմբերի 3-ին կայացած նախագահական ընտրությունների արդյունքները, ըստ որոնց՝ հաղթանակ է տարել դեմոկրատ Ջո Բայդենը, ներխուժել էին ԱՄՆ Կոնգրեսի շենք՝ փորձելով թույլ չտալ արդյունքների վերջնական հաստատումը Սենատի կողմից: Անկարգությունների հետևանքով 5 մարդ է մահացել: