Եզան լեզու, բժշկական սպիրտ․ Իսահակյան գյուղից երկու կին սիբիրյան խոցով տեղափոխվել է հիվանդանոց, որոնք զբաղվել են ինքնաբուժությամբ
Շիրակի մարզի Իսահակյան գյուղում ևս երկու կնոջ մոտ հայտնաբերվել է Սիբիրյան խոց։ Այս մասին Tert.am-ի հետ զրույցում հայտնեց Գյումրու ինֆեկցիոն հիվանդանոցի տնօրեն Աստղիկ Բեյբությանը։
Ըստ նրա, կանայք տեղափոխվել են բավականին ծանր վիճակում, խորը այտուցներով։ Բանն այն է, որ տնային պայմաններում զբաղվել են ինքնաբուժությամբ, կիրառել են բժշկական սպիրտ, եզան լեզու և այլ՝ ավանդական միջոցներ։
Այս պահին հիվանդանոցում բուժվում է 8 քաղաքացի։ Ընդհանուր առմամբ Սիբիրյան խոց ախտորոշմամբ բժշկական հաստատություն է դիմել 10 քաղաքացի, 6 կին, 4 տղամարդ։ Քաղաքացիներից երկուսն արդեն առողջացել են ու դուրս գրվել։
Աստղիկ Բեյբությանը հայտնեց, որ տղամարդիկ վարակվել են անասուններին մորթելու արդյունքում, իսկ կանայք՝ մսի մշակման։ Վարակը փոխանցվում է վարակված մսի հետ անմիջական շփման արդյունքում։ Մարդուց մարդ անցումն էլ հնարավոր է, եթե կա մաշկի ամբողջականության խախտում՝ վերքեր, վնասվածքներ և այլն։
Աստղիկ Բեյբությանը հորդորեց քաղաքացիներին որևէ պարագայում չզբաղվել ինքնաբուժությամբ, քանի որ դա կարող է միայն վատթարացնել վարակվածի վիճակը։ Սիբիրյան խոցը բուժվում է բացառապես ստացիոնար պայմաններում։