Պետական կառավարման համակարգն անհրաժեշտ է վայրկյան առաջ համալրել մասնագիտական մեծ պատրաստվածություն ունեցող կադրերով՝ անկախ նրանց քաղաքական հայացքներից․ Աբրահամ Գասպարյան (տեսանյութ)
Հերթական ուղիղ եթերում Նիկոլ Փաշինյանն ընդգծեց, որ եթե կորոնավիրուսի դինամիկան չկոտրվի, ամեն օր տասնյակ, հարյուրավոր մարդիկ են մահանալու, և ստիպված են լինելու դարձյալ սահմանափակումներ մտցնել։ Փաշինյանն ասաց, որ վիճակը գնալով վատանում է, որովհետև բոլորս լուրջ չենք վերաբերվում կորոնավիրուսին: Բոլորս: Այս մասին Այս մասին «Արմնյուզ» հեռուստաընկերության «Երեկոյան լուրեր Աբրահամ Գասպարյանի հետ» հաղորդման ընթացքում ասել է Գասպարյանը։
«Որ վիճակը վատանում է՝ գիտենք բոլորս, որ պետք էր վաղուց լրջանալ և բոլորն անխտիր՝ պետության ղեկավարից մինչև շարքային քաղաքացի, դա էլ գիտենք: Իհարկե, սա այն դեպքը չէ, որ պետք է դիվիդենտներ հավաքել իշխանության սխալների վրա, հարցն ուռճացնել ու հասցնել պետական դավաճանության… ինչպես փորձում են անել որոշ ընդդիմադիր ուժեր կամ քաղաքական մեծ կշիռ չունեցող դերակատարներ: Ոչ: Հակառակը: Պետք է կարողանանք սթափ դատել ու մտածել նավը փրկելու մասին, անկախ նավապետի նկատմամբ մեր ունեցած համակրանքից կամ հակակրանքից: Բայց այդ դիսկուրսը ճիշտ տանելու համար պետք է նավի ժողովուրդն ու նավապետը բաց լինեն զրույցի համար»,- նշել է Գասպարյանը և հավելել՝ ով խոսեց, բերանը փորձեցին փակել․ «պիտակավորեցիք որպես հակահեղափոխական, հակապետական, փորձեցիք պատերին ծեփել, ասֆալտին փռել, անտեսեցիք…ձեր մերձավորների գործողությունների վերաբերյալ ոչ թե ասեկոսեներ, այլ կոնկրետ մեղադրանքներ հնչեցին, որոնց դուք չպատասխանեցիք, հայտարարեցիք՝ մենք անսխալական ենք, մենք սուրբ ենք, հո չե՞նք ապացուցելու, որ գող կամ ուղտ չենք, ով էլ չի հավատում՝ թող նախկիններին բերի»:
Գասպարյանը, դիմելով իշխանությանը, նշել է, որ մտածող մարդկանց մոտ իրենք ստեղծում են տպավորություն, որ խուճապի են մատնված․ «Այս մարդիկ իրավունք ունեն չհամաձայնել ձեր վարած քաղաքականությանը։ Նրանք իշխանության լեգիտիմությունը չափում են կոնկրետ գործով ու արդյունքով, ոչ թե կույր հավատով, ձեզ փառաբանելով կամ հակառակը՝ միայն վատաբանելով, ինչպես ձեր իսկ ասած՝ սևերն են անում: Այդ մարդիկ մեր երկրի ներկայով ու ապագայով մտահոգ քաղաքացիներ են, որոնք, այո, գնահատում են կոռուպցիայի դեմ մղած ձեր պայքարը, բայց սկսում են տարակուսել, երբ ձեր աներորդու անունն է շոշափվում սկանդալի շրջանակում, իսկ դուք չեք պատասխանում»,- նշել է նա և հավելել, որ դա անընդունելի է և կասկած է հարուցում անկեղծության նկատմամբ:
«Մեր քաղաքացին ուզում է արդյունավետ կառավարման արդյունքը տեսնել, որակյալ կրթություն ստանալ, առողջության համար միլիոններ չծախսել ու դրսում բուժվել, երջանիկ ծերանալ: Այդ ամենի համար իշխանությունն ուներ 2 տարի ժամանակ, կարելի էր, չէ՞, հեղափոխության եզրույթի ֆետիշացման ու ամբոխահաճո ելույթների փոխարեն գործ անել: Զգուշ նայե՛ք ձեր շուրջը…արդյո՞ք ձեր հիմնադրած կուսակցությանը զինվորագրվածները հավատարիմ են ձեզ, արդյո՞ք քաղաքական թիմը միակարծիք է, որ դուք անվիճելի ղեկավար եք»։
Գասպարյանի դիտարկմամբ՝ ճգնաժամերի ընթացքում, երբ որևէ կառույցի, կառավարման օղակի կամ ղեկավար հեղինակության անկում է ունենում, առաջնորդվում է Բրանդֆորդի բանաձևով․ «4 քայլանի կոմբինացիա է. նախ՝ ժխտել, հետո՝ արդարացնել, վերջում հիմնավորել ու գնալ զիջման: Ամեն ինչ տեսանք, բացի վերջինից: Զիջումը մեր երկրի դեպքում չպետք է լինի տղայական ընկալման դաշտում, այլ՝ կոնկրետ գործով: Երկիրը պետք է դուրս բերել մշուշոտ հեռանկարից: Սկզբում խնդիրը դիտարկեցինք որպես համավարակ, հետևանքն եղավ այն, որ կաթվածահար արեցինք տնտեսությունը։ Հիմա տնտեսական միջամտություն ենք անում, բայց ընդլայնում ենք համավարակի աշխարհագրությունը: Կառավարումն աննպատակ գիտություն չէ: Գոյություն ունի «օպտիմալ այլընտրանք» հասկացություն. Կամ պիտի գնանք նվազագույն կորուստների, կամ առավելագույն օգուտներ քաղելու ճանապարհով։ Պետական կառավարման համակարգն անհրաժեշտ է վայրկյան առաջ համալրել մասնագիտական մեծ պատրաստվածություն ունեցող կադրերով՝ անկախ նրանց քաղաքական հայացքներից: