Արդյո՞ք նորմալ կընդունենք, որ մեր 6 տարեկան երեխան դպրոցից գա տուն ու հարցնի՝ հայրի՛կ, մենք իմացանք, որ տղայից ու աղջկանից բացի կա 3-րդ սեռ. Աբրահամ Գասպարյանը՝ Լանզարոտեի կոնվենցիայի մասին
Շաբաթվա սկզբից, երբ թողարկումների ու փոքր հետաքննությունների շարք սկսեցինք մեր եթերում Լանզարոտեի կոնվենցիայի խութերի ու ռիսկերի վերաբերյալ, մեր խմբագրություն են զանգում բազմաթիվ քաղաքացիներ և իրավացիրոեն նշում, որ օրենքն ինքնին որևէ վատ դրույթ չի պարունակում, որ իրապես կոչված է երեխաներին պաշտպանելու սեռական ոտնձգություններից ու բռնությունից, որ Հայաստանն ի վերջո օրենքով կպատժի երեխաների սեռախեղներին ու բռնության ենթարկողներին: Այս մասին «Արմնյուզ» հեռուստաընկերության «Երեկոյան լուրեր Աբրահամ Գասպարյանի հետ» հաղորդման ընթացքում ասել է Գասպարյանը, որ համաձայն է ու բազմիցս էլ կրկնել է, որ այս օրենքն առերևույթ որևէ հակամարդկային, հոմոֆոբ, երեխաների իրավունքները ոտնահարող դրույթ չի պարունակում, չի էլ կարող պարունակել:
«Խնդիրն այստեղ այդ օրենքի որոշ եզրույթներ են, որոնք տարատեսակ մեկնաբանությունների տեղիք են տալիս և միարժեք չեն ընկալվում: Այ օրինակ ի՞նչ է նշանակում երեխայի սեռական կողմնորոշում, որն ամրագրված է կոնվենցիայի 2-րդ հոդվածում: Մի պահ դիտենք, թե ամբողջությամբ ինչ է գրված այդ հոդվածում: Հա, ի դեպ, 3-րդ հոդվածով էլ երեխա է համարվում մինչև 18 տարեկան անհատը»,-դիտարկել է Գասպարյանը:
Անդրադառնալով հայաստանյան մասնագիտական շրջանակների մտահոգությանը՝ նա նշել է, որ հենց այդ՝ երեխայի սեռական կողմնորոշում արտահայտությունն է, որն ընդհանուր հոդվածում աչքի չի ընկնում, բայց անընդունելի է այդ մասնագետների համար. «Նրանք ընդգծում են, որ երեխան չունի նման խնդիր, ոչ էլ պետք է փոքր տարիքում գիտակցի կամ հասկանա այդ ամենը: Մտահոգ հատվածը փաստարկում է՝ այս կոնվենցիայի վավերացմանը հաջորդելու է կրթական ծրագրերի ու դրամաշնորհների շքերթ: Հարց է առաջանալու՝ որտեղի՞ց այդքան արհեստավարժ մասնագետ մեր դպրոցներում, որ այդ ամենը կարողանան երեխային բացատրել հմտորեն, առանց վերքոտ ակոսներ բացելու նրա մտածողության մեջ»:
Փորձելով իրողությունն առավել պարզ մեկնաբանել՝ Գասպարյանը նշել է. «Արդյո՞ք մենք նորմալ կընդունենք, որ մեր 6 տարեկան երեխան դպրոցից գա տուն ու հարցնի՝ հայրի՛կ, մենք այսօր իմացանք, որ տղայից ու աղջկանից բացի 3-րդ սեռ էլ կա…»:
Հեռուստամեկնաբանը նկատում է, որ թեպետ վերջին նախադասությունը կոնվենցիայում չի կարող գրվել, սակայն Եվրոպայում՝ վերջին 40 տարում արդեն սովորել են այս վիճակներին և իրենց համար պարզագույն է 3-րդ սեռի գոյությունը:
«Ես չեմ ասում, որ իշխանությունը երկրի խնդիրները թողած պիտի լծվի սերունդ փչացնելու գործին: Չեմ հավատում, երկրի շահով ու ապագայով մտահոգ ոչ մի իշխանություն չի գնա նման քայլի: Վստահ եմ: Բայց ո՞վ կերաշխավորի, որ նման կրթական ծրագրեր դպրոցներ չեն թափանցի զարտուղի ճանապարհներով, այսինքն՝ մի փոքր սպասեն, թեման դուրս գա օրակարգից ու այսպես կոչված՝ մասնագետի կամ մանկավարժի նման կոչում ունեցողները չմտնեն դպրոց»:
Մանրամասները՝ տեսանյութում: