Այս իշխանությունն ինքն իրեն թաղում է ավելի արագ քան դա կարող է անել նախկին ռեժիմը. Հայկ Մարտիրոսյան
Քաղաքագետ Հայկ Մարտիրոսյանը ֆեյսբուքյան իր էջում գրառում է կատարել՝ անդրադառնալով այսօր ԱԺ-ում տեղի ունեցած ծեծկռտուքին:
Գրառումն ամբողջությամբ ներկայացնում ենք ստորև.
«Իհարկե, իրենց լևոնիստ և իսլամիստ մարտիկի բառապաշարով սպառնացող պատգամավորին ամենայն հավանականությամբ կստիպեն մանդատը վայր դնել: Առաջինը` որ նախքան Մարուքյանին հարվածելը, իր պահվածքով նա նախ ապտակեց իր վարչապետին: Եվ հետո` այդ զոհաբերությունն այն գինն է լինելու, որով իբրև թե փորձելու են մեղմել սեփական խմբակին հասցված քաղաքական ծանրագույն հարվածը:
Մանդատ վայր դնել տեղի չի ունենա միայն երկու դեպքում. եթե լևոնիստ երկրապահապետը հրապարակայնորեն ներողություն խնդրի Մարուքյանից և կամ եթե այդ ներողությունն անուղղակիորեն խնդրի վարչապետն ինքը:
Եվ երրորդ տարբերակն այն է, որ սկսում է արտացոլել Ալեն Սիմոնյանը. որ մանդատ չպետք է վայր դրվի, որովհետև երկրապահապետը ամենաշատ ձայն ստացած պատգամավորն է: Դա իհարկե, ցինիզմի արտացոլում է, որ կվանի բազում չկողմնորոշված քաղաքացիների և քաղաքական ինքնասպանության լավագույն ուղիներից է և թերևս առավել ձեռնտու` քայլիստների քաղաքական զրոյացման տեսանկյունից:
Բայց մի դիտարկում. կադրում չկար ինքը` վարչապետը: Մինչդեռ վարչապետն իր հեղինակությամբ` պարտավոր էր կանգնեցել այդ ամենն իր անձնական միջամտությամբ և ոչ հեռու մնալ կատարվողից: Անվտանգության խնդիր էլ այստեղ չկար. թիկնապհները կարող էին պաշտպանել նրան սեփական կուսակիցներից: Բայց վարչապետը չկար, ուղղակի բացակա էր: Փոխարենը, ըստ կասկածների` նրա բարեկամները թիկունքից հարվածում էին խորհրդարանական ընդդիմության առաջնորդին:
Այս իշխանությունն ինքն իրեն թաղում է ավելի արագ քան դա կարող է անել նախկին ռեժիմը և անգամ դրսի այն ուժերը, որ այնքան ուզում են այս խմբակին հեռացնել Հայաստանի իշխանական լծակներից: Ինքնակործանումը հիրավի, ամենաարդյունավետ պայքարի մեթոդն է ոմանց համար:
Ինչպես և կանխատեսել էինք դեռ երեկ` իրադարձություններն ընթանում են այս իշխանության փլուզման ուղով»: