Որևէ մեկը չպետք է մանդատը վայր դնի, Սասուն Միքայելյանը ՀՀ-ում ամենաշատ վստահության քվեն է ստացել, թող Մարուքյանն ու Անի Սամսոնյանը մանդատը վայր դնեն՝ սադրանքներ կազմակերպելու համար. Ալեն Սիմոնյան
Ես պնդում եմ, որ դա նախապատրաստված սադրանք էր, որ ունի շարունակական բնույթ: Այս մասին ԱԺ-ում լրագրողների հետ զրույցում ասաց ԱԺ փոխնախագահ Ալեն Սիմոնյանը՝ անդրադառնալով ԱԺ-ում տեղի ունեցած ծեծկռտուքին:
Նա նշեց, թե տեղի ունեցածն անընդունելի էր, բայց պետք է մի բան արձանագրել, որ այս ամենը անմիջական կապ ունի նախօրեին հնչած սեռական բնույթի հայհոյանքի հետ, որը տեղի ունեցավ դահլիճում, կապ ունի այն օրենքների հետ, որոնք ընդունվել են:
«Մայիսի 8-ին Սասուն Միքայելյանին սադրելը ես համարում եմ անընդունելի, ես համարում եմ, որ իրեն «կլասիկ» հռչակած քաղաքական գործիչն իրավունք չունի ԱԺ դահլիճում հայհոյանքներ հնչեցնել: Ընտրվել է մարտավարություն, որ սկզբից իրավիճակը դահլիճում լարվում է Անի Սամսոնյանի ելույթով, որտեղ օգտագործվում են այնպիսի բառեր, ինչպիսիք են «հիստերիկ» և այլն: Հետագայում դուրս է գալիս և խոսում է սադրելով, խոսում է դու-ով մի մարդ, որն օրեր առաջ սեռական բնույթի հայհոյանք է հնչեցրել: Եվ բնական է՝ երբ դու ամբիոնից իջնում ես և «վրա ես քշում» Սասուն Միքայելյանի վրա մայիս 8-ով և փորձում սադրել, մարդը կարող է նաև այդ սադրանքին չդիմանալ»,- ասաց Ալեն Սիմոնյանը՝ ընդգծելով նաև, որ բռնությունն անընդունելի է, այդտեղ երկրորդ կարծիք չկա:
«Տարբեր երկրների պառլամենտներում նման բան տեղի է ունեցել, բայց անընդունելի է: Բայց մենք, բացի այս պահին գնահատական տալուց, պետք է հասկանանք, թե ինչու է դա տեղի ունեցել, և անենք ամեն ինչ, որ նման բան այլևս տեղի չունենա: ԱԺ-ն տեղ չէ, որտեղ երրորդ խմբակցության ղեկավարը, կամ որևէ պատագամավոր պետք է սեռական բնույթի հայհոյանքներ հնչեցնի: Բոլորը տեղից ռեակցիա են տալիս, բայց երբ դու փորձում ես այդ իրավիճակում քեզ զոհի կարգավիճակ շնորհել, ճիշտ չէ, նույն բանն Էդմոն Մարուքյանն անում էր «Բարգավաճ Հայաստան» խմբակցության հետ, երբ ԱԺ-ն նոր էր ձևավորվել, տեղից վեր է կենում, մոտենում էր: Դա ագրսեիվ պահվածք է»,-ասաց ԱԺ փոխնախագահը:
Հարցին՝ Սասուն Միքայելյանը մեղավո՞ր էր, Սիմոնյանը պատասխանեց, թե որևէ մեկին մեղավոր կամ անմեղ չի դարձնելու:
Նա նշեց, թե որևէ մեկը մանդատը վայր դնելու կամ նկատողության հետ կապված քննարկում չի արել, իսկ հարցին՝ պետք չէ՞, որ մի քանիսը մանդատը վայր դնեն, Սիմոնյանը պատասխանեց. «Որևէ մեկը չպետք է վայր դնի: Սասուն Միքայելյանը ՀՀ-ում ամենաշատ վստահության քվեն է ստացել, և իր վստահության հարցը պետք է որոշի իր ընտրողը մյուս ընտրությունների ժամանակ: Էդմոն Մարուքյանը, Անի Սամսոնյանի հետ միասին, կարող է մանդատը վայր դնել՝ սադրանքներ կազմակերպելու, սեռական հայհոյանքներ հնչեցնելու համար»,- ասաց նա՝ նշելով, թե վերջիններս պետք է ՀՀ քաղաքացիներից ներողություն խնդրեն:
Հարցին՝ իր կարծիքով՝ «Իմ քայլը»-ի վարկանիշը տեղի ունեցածից հետո ընկա՞վ, Սիմոնայնն արձագանքեց, թե վարկանիշի համար կանհանգստանան ընտրությունների ժամանակ, եթե քաղաքացիները կգտնեն, որ չպետք է քվեարկեն, չեն քվեարկի:
Հիշեցնենք՝ պատգամավորների միջև ծեծկռտուքը տեղի ունեցավ Կառավարության 2019թ. ծրագրի քննարկման ընթացքում: «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ Սասուն Միքայելյանը միջամտեց, ինչին հաջորդեց Էդմոն Մարուքյանի պատասխանը, թե՝ «ինչը կցխեք»: Էդմոն Մարուքյանն իջավ ամբիոնից, ինչից հետո Սասուն Միքայելյանի ու նրա միջև ծեծկռտուք տեղի ունեցավ, որին միջամտեցին այլ պատգամավորներն ու Կառավարության անդամները: