Այդ 90 հատոր գործերը երթուղայինով մարդիկ մի դատական նիստից տեղափոխում են մյուսին. Նաիրա Զոհրաբյանը՝ հանրային պաշտպանների մասին (տեսանյութ)
Այսօր հանրային յուրաքանչյուր պաշտպան տարեկան քննարկում է միջին հաշվով 130-160 գործ և նրանք օրվա մեջ մի քանի դատական նիստի կարող են մասնակցել, տարբեր վայրերում: Այս մասին այսօր Ազգային ժողովում իր ելույթում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով իրենց կողմից առաջարկված նախագիծը ԱԺ օրակարգ չներառելուն:
«Այդ 90 հատոր գործերը երթուղայինով նստած մարդիկ մի դատական նիստից տեղափոխում են մյուսին, և չի կարող երթուղայինի վարորդից չեկ վերցնել, որ տանի այդ հարյուր դրամները փոխհատուցվի: Հետո բողոքում ենք այդ հանրային պաշտպանի չկայացված լինելուց»,-ասաց նա և նշեց, որ դեմ քվեարկության թույլ չեն տալիս, որ կայանա: Նա նշեց, որ դատապարտյալը մեկ անգամ կարող է տեսած լինել իր հանրային պաշտպանին, քանի որ նրանք ծանրաբեռնված են:
Նշենք, որ Փաստաբանության մասին ՀՀ օրենքում փոփոխություններ և լրացումներ կատարելու մասին օրենքի նախագիծը ստացել էր բացասական եզրակացություն և առաջարկվում էր Հանրային պաշտպանի գրասենյակի ղեկավարի և հանային պաշտպանների պաշտոնային դրույքաչափերի առնվազն 10 տոկոսի չափով հավելյալ միջոցներ տրամադրել:
Նախագծի համահեղինակ «Բարգավաճ Հայաստան» կուսակցությունից Շաքե Իսայանը նշեց, որ դրանով նախատեսվում է Հանրային պաշտպանի գործունեության հետ կապված ծախսերը փոխհատուցել պետական բյուջեից, որոնք ներառում են լրացուցիչ աշխատվարձի գումարները, ինչպես նաև Հանրային պաշտպանի գրասենյակի գործունեության ապահովման, այդ թվում նաև օժանդակ աշխատակազմի վարձատրության, ճանապարհային և հեռախոսային խոսակցության ծախսերի փոխհատուցման հետ կապված այլ ծախսերը: